Kosova

700 milionë euro ndërtimi i autostradës ‘gjigante’ Prishtinë-Shkup

"Përafërsisht i tërë projekti i kësaj autostrade del të jetë shuma e kësaj rreth 700 milionë euro” ka thënë ministri Lekaj

Ndër përgjegjësitë e diskasterit të infrastrukturës në Qeverinë e Kosovës është edhe ndërtimi i autostradave. Aktualisht më e përfolura është autostrada “Arbër Xhaferi” që e lidh Prishtinën me Shkupin.

Ministri i Infrastrukturës, Pal Lekaj ka thënë se për këtë projekt nga buxheti i Kosovës janë ndarë shumë miliona euro.

“Sa i përket autostradës “Arbër Xhaferi” punimet janë duke shkuar sipas parashikimeve dhe janë në segmentin që deri në Ferizaj ky segment i dytë do të përfundojë këtë vit, në muajin dhjetor. Përafërsisht i tërë projekti i kësaj autostrade del të jetë shuma e kësaj rreth 700 milionë euro” ka thënë Lekaj.

Po ashtu ministri Leka ka treguar edhe datën se kur do të përfundojë kjo autostradë. Lekaj thotë se ky projekt sjellë shumë impakt pozitiv në zhvillimin ekonomik në vend.

“Ne jemi zotuar që autostradën do ta përcjellim në vitin 2018 me vija buxhetore  dhe kjo autostradë do të përfundojë me 31 dhjetor 2018. Mendoj se është një diçka  e madhe për Kosovën sepse lidh korridore dhe ka impakt pozitiv në zhvillimin ekonomik”, ka përfunduar Lekaj.