Jeta në Zvicër

Aksident i tmerrshëm në Jura me një viktimë, vetura ndahet në dy pjesë

Bashkudhëtarja e tij ka përjetuar shok të vërtetë, por ka kaluar vetëm me lëndime të lehta

Gjatë një aksidenti spektakolar në Courfaivre të Kantonit Jura, mëngjesin e së hënës, një person ka gjetur vdekjen.

Bashkudhëtarja e tij ka përjetuar shok të vërtetë, por ka kaluar vetëm me lëndime të lehta, edhe përkundër faktit se vetura është ndarë në dy pjesë.

Aksidenti është shkaktuar pak para orës 02:00, në hyrje të fshatit Courfaivre, thuhet në një komunikatë të Policisë Kantonale të Jura, përcjell Albinfo.ch. Pak para hyrjes në fshat, dyshohet se vozitësi e ka humbur kontrollin mbi veturë për shkak të shpejtësisë së madhe.

Si pasojë e kësaj, vetura ka dalë nga ana e majtë e rrugës, duke kaluar nëpër fushë e më pas ka goditur një barrierë metalike të një hambari, në atë mënyrë sa që është ndyrë në dy pjesë. Përderisa pjesa e pasme e veturës po rrotullohej në afërsi të rrugës, pjesa e përparme ka vazhduar të lëvizë në drejtim të një ferme. Aty, pjesa e veturës përplaset edhe me dy pjesë të traktorit, të cilat kanë qenë të vendosura para objektit. Me këtë rast, vozitësi është hedhur nga brendia e veturës në mënyrë të fuqishme, duke u përplasur për fasadën e objektit.

Edhe përkundër masazhit të zemrës nga policia dhe më vonë edhe nga ekipi kujdestar mjekësor, vozitësi ka vdekur në vendngjarje. Bashkudhëtarja e tij ka kaluar me lëndime të lehta, por ka përjetuar tronditje të rëndë. Për procesverbalin e aksidentit, rruga ka qenë e mbyllur plot tre orë.