Rexhepi: Nuk intervenojmë në veri

Ministri kosovar i Punëve të Brendshme, Bajram Rexhepi ka zbutur qëndrimin karshi komunave të “rebeluara” të Kosovës. Ai tash ka përjashtuar mundësinë e përsëritjes së intervenimit në veri, ndërsa tha se Qeveria e Kosovës është e interesuar që të shuhen strukturat paralele atje dhe veri dhe të integrohet në kuadër të institucioneve të Prishtinës.

“Qeveria e Kosovës është e përkushtuar që t’i shuajë strukturat paralele në veri, mirëpo kjo nuk mund të arrihet pa ndihmën e KFOR-it dhe policisë së EULEX-it”, ka thënë Rexhepi gjatë vizitës që i bëri fshatit Drenoc të Klinës, raporton RTK. Ai ka thënë se është i interesuar për integrimin e asaj pjese të vendit.

Ndryshe Bajram Rexhepi disa herë ka kërcënuar se do të intervenojë sërish me njësitë ROSU në veri. Madje disa herë njësitet speciale të policisë kosovare janë dislokuar në Mitrovicë, për raste intervenimi. Kjo është hera e parë e ministrit të rendit që deklarohet se në veri nuk mund të ndërhyhet vetëm.

Një vit më parë, më 25 korrik, me urdhër të kryeministrit Hashim Thaçi njësitet e policisë kosovare intervenuan në veri. Ky intervenim rezultoi me një polic të vdekur, por për herë të parë institucionet e Kosovës u dislokuan në pikat 1 dhe 31, përkatësisht në dy akset rrugore që lidhin Kosovën me Serbinë.

Ministria Rexhepi gjatë vizitën në Klinë, nërkaq tha se MPB dhe Policia e Kosovës po angazhohen maksimalisht që qytetarët e Kosovës të ndjehen të sigurt në vendin ku jetojnë. Rexhepi dënoi djegien e dy shtëpive të banoreve serbë, që kishte ndodhur kohë më parë, në fshatin Drenoc të Klinës.

Ai ka kërkuar nga Policia e Kosovës që të caktojë një zyrtar policor, që të jetë në kontakt të drejtpërdrejtë me qytetarët, në mënyrë që Policia e Kosovës të jetë sa më afër për reagime në rast nevoje.

Drejtori i Përgjithshëm i Policisë së Kosovës Shpend Maxhuni ka thënë se Policia e Kosovës është çdo herë e gatshme që t`u ofroj siguri banorëve të komunës së Klinës dhe se stacioni i Policisë në Klinë ka kapacitete të mjaftueshme për t`i siguruar qytetarët e kësaj komune.

Ministri kosovar i rendit, ka vizituar Istogun, por edhe fshatin Talinovc të Ferizajt ku dy javë më parë u vranë me armë gjuetie dy serbë të familjes Jevdiq. Rexhepi e informoi familjarët dhe qytetarët e asaj zone se Policia e Kosovës së bashku me EULEX-in është duke vazhduar hetimet lidhur me zbardhjen e këtij rasti.