Integrimi

Asamblistët e Wil-it votojnë pro: imami Bekim Alimi merr pasaportën zvicerane

Vendimi pro natyralizimit të imamit Bekim Alimi u mor me epërsi të dukshme votash: 26 asamblistë votuan pro, 10 kundër dhe një abstenim

Vendimi në favor të natyralizimit të imamit Bekim Alimi me rastin e votimit në Asamblenë e qytetit Wil në Kantonin St. Gallen u mor me epërsi të dukshme votash: 26 asamblistë votuan pro, 10 kundër dhe një abstenim.
Për rëndësinë e madhe që po i jepet në regjionin e Zvicrës Lindore (kryesisht në Kantonin St. Gallen) procesit të natyralizimit të imamit shqiptar Bekim Alimi, tregon edhe fakti se gazeta kryesore e këtij regjioni “St.Galler Tagblatt” në edicionin e saj online po raporton minutë pas minute (me live-ticker) nga mbledhja e Asamblesë së qytetit Wil. Në këtë asamble në këto orë merret vendimi për ose kundër dhënies së pasaportës zvicerane imamit të xhamisë së këtushme shqiptare i cili njëherësh është kryetar i Bashkësisë së Shoqatave Islame të Zvicrës Lindore (Digo).
Në një lajm të mëhershëm të publikuar sot, po kjo gazetë, në versionin e saj online kishte shkruar se disponimi në mesin e asamblistëve ishte qartë në favor të natyralizimit, shkruan albinfo.ch. Këtu bënin përjashtim vetëm këshilltarët e partisë së djathtë konsevatore, SVP.
Edhe në mbledhjen e asamblesë përfaqësuesit e grupeve parlamentare kanë shprehur qëndrimet e tyre, me ç`rast sërish kundër ka qenë vetëm SVP-ja.

Pasaporta atij i qe mohuar muaj më parë pasi që një ish asamblist kishte shprehur rezerva rreth personalitetit të tij, shkruan albinfo.ch. Ai kishte pretenduar se imami si bartës i funksioneve të përmendura nuk ishte shembull i mirë për integrim në shoqërinë zvicerane, duke e identifikuar si njeri mbi të cilin rëndojnë dyshime për radikalizëm fetar.

Ndërkohë që familjarët e tij e patën marrë nënshtetësinë dhe pasaportën e Zvicrës, për Alimin pati mbetur që të vendoste Asamblea Komunale e Wilit.

Pak kohë para se të merret ky vendim, mediat, sidomos ato të Zvicrës lindore, kanë shkruar në mënyrë të përsëritur rreth rastit. Fillimisht, një asambliste e Wilit (nga GLP) i kishte shtruar atij një katalog me 12 pyetje, duke aluduar në rolin e dyfishtë të imamit.

Në përpilimin e këtyre pyetjeve ajo, siç kishte pranuar vetë, kishte pasur ndihmën edhe të kritikes së njohur të islamit Saida Keller Messahli. Një filozof i njohur zviceran ishte përfshirë në debat, duke quajtur absurde dhe tendencioze mënyrën e pyetjeve të bëra, transmeton albinfo.ch. Vetë Alimi po ashtu u ishte përgjigjur pyetjeve në fjalë.

Ndërkaq të dielën që shkoi, në gazetën “Ostschweiz am Sonntag” Saida Keller Messahli ka dhënë një intervistë në të cilën ngul këmbë se “shumica e xhamive të Zvicrës lindore janë radikale”. Në krye të këtyre (17) xhamive është imami Bekim Alimi. E pyetur nga gazeta për argumentet lidhur me radikalizmin e Alimit dhe të xhamive “të tij”, ajo këmbëngul se një pohim i tillë qëndron, duke përmendur veç tjerash paraqitjen në njërën nga këto xhami, të ish deputetit të kontestuar kosovar, Gëzim Kelmendi.

Ndërsa e ballafaquar me konstatimin e gazetarit se autoritetet e sigurisë në kanton nuk kanë asnjë vërejtje lidhur me imamin shqiptar nga aspekti i sigurisë, ajo thotë se ai personalisht nuk përbën rrezik direkt të sigurisë, transmeton albinfo.ch. Por, ai, duke lejuar predikues radikalë që të prezantohen në xhamitë që i udhëheq, luan vetvetiu një rol negativ.

Po ashtu sipas Messahli, imami Bekim Alimi paraqitet publikisht si imam i moderuar ndërkohë që nuk distancohet nga predikuesit radikalë e salafistë.

Por Alimi i përgjigjet kritikes së tij në një prononcim për gazetën Tagblatt, duke i quajtur akuzat e saj paushalle e të pambështetura në fakte.

Njësoj, paushalle dhe të paargumentuara i cilëson akuzat e përmendura edhe drejtori për siguri në ekzekutivin e Kantonit St. Gallen, Fredy Fässler, nga SP.