LIVE STYLE

Batuta mbi “të metat mentale” i shkakton telashe Bendrit Bajrës

"Kjo ide është me të meta mentale"është fjalia e menduar si një batutë që do të sillte të qeshura të publikut. Por, para se të arrijë te publiku, ajo ka shkaktuar nervozë te zëdhënësja e Pro Infirmis, Susane Stahel

Komiku Bendrit Bajra ka fituar statusin e yllit të humorit ndër të rinjtë e Zvicrës përmes postimeve në internet ku vë në lojë stereotipet e njohura për të huajt dhe kryeisht shqiptarët. Pas facebook-ut ku ai me mbi 200 mijë ndjekës është ndër më të suksesshmit në Zvicër, Bendriti është angazhuar edhe në emisione, filma e komedi televizive.

Angazhimi më i ri i tij, ai në komedinë filmike “Flitzer” duket se do t`i shkaktojë telashe, akoma pa dalë para publikut. Siç shkruan blick.ch, një fjali, batutë e vetme e Bendritit në rolin e berberit, ka alarmuar shoqatën “Pro Infirmis” e cila mbështet personat me të meta mentale, transmeton albinfo.ch. Shoqata reagon ndaj fjalisë që “berberi” Bendrit ia thotë “klientit” të tij, aktorit të njohur Beat Schlatter: “Kjo ide është me të meta mentale!” Schlatter i kishte përmendur planin e tij për një lojë origjinale bastesh, e cila do t`i sillte fitime marramendëse. Fjala është për baste me personat lakuriq që vrapojnë në stadiumet e futbollit.

Kjo fjali është menduar si një batutë e mirë që do të sillte të qeshura të publikut, përcjell albinfo.ch. Por, para se të arrijë te publiku në sallat e kinemasë (më 12 tetor është premiera), ajo ka shkaktuar nervozë te zëdhënësja e Pro Infirmis, Susane Stahel.

“Kjo shprehje (me të meta mentale) si koncept është thjesht diskriminuese. Njerëzit me aftësi të kufizuara – pasi që gjuhën profesionale shprehja “me të meta mentale “pothuajse nuk përdoret –njësoj sikur njerëzit pa aftësi të kufizuara, mund të kenë ide të mira ose të këqija”, thotë Stahel.

“Problematik është fakti se personat si Bendriti dhe Beat Schlater kanë një funksion model për të tjerët dhe përdorimi i një gjuhe si kjo mund të shndërrohet shpejt në problem”.  Bendriti ka, para së gjithash te të rinjtë një publik shumë të gjerë, kur dihet se në facebook atë e ndjekin mbi 200 mijë veta.

Përfundimisht, Stahel thotë se batuta në fjalë duhet të hiqet nga filmi ose të siformulohet.