Presidentja Jahjaga dekoroi ambasadorin Dell

Presidentja e Kosova, Atifete Jahjaga e dekoroi ambasadorin e Shteteve të Bashkuara të Amerikës në Kosovë, Christopher Dell, me Urdhrin për Paqe, Demokraci dhe Humanizëm “Dr.Ibrahim Rugova”. Ku çmim, sipas Jahjagës, i jepet për kontribut të veçantë për ndërtimin e paqes, zhvillimin e demokracisë dhe kultivimin e humanizmit në Kosovës.

Presidentja tha se është e nderuar që si Presidente e vendit të shpreh falënderimin e të gjithë qytetarëve të Kosovës për angazhimin, punën dhe mbështetjen e pakursyer që ambasadori Dell ka bërë në Kosovë, për popullin dhe institucionet e Kosovës.

“Medalja është një përkujdesje e vogël, simbolike për të shprehur vlerësimin dhe falënderimin tonë për punën jo vetëm në mandatin e parë, por edhe për mandatin e dytë, që ambasadori Dell ka bërë në ndihmë të Republikës së Kosovës dhe popullit të saj, për liritë dhe të drejtat e njeriut, zhvillimin e proceseve demokratike, për sundimin e rendit dhe ligjit dhe për shtetndërtimin”, vijoi tha Jahjaga.

Në ceremoninë e dekorimit ishin të pranishëm ish-presidenti Fatmir Sejdiu, zëvendëskryeministrat, Behgjet Pacolli, Slobodan Petroviq e Mimoza Kusari, ministrat Enver Hoxhaj e Bajram Rexhepi e zyrtarë të tjerë të lartë.

Ndërsa ambasadori Dell u shpreh i nderuar për dekoratën që ia dha Presidentja Jahjaga.

“Jam veçanërisht i nderuar që tre presidentët e Kosovës janë këtu sot, dhe simbolikisht edhe Dr. Rugova është me ne sot në ndarjen e këtij çmimi. Dr. Rugovën e kam njohur mirë që nga vizita ime e parë këtu dhe vlerat të cilat ai pati përqafuar dhe rolin që luajti në përpjekjet e Kosovës për të fituar lirinë dhe pavarësinë janë vërtet inspirim për të gjithë ne që kemi privilegjin të punojmë me institucionet e”, tha Dell.

Diplomati amerikan i cili e përfundon mandatin në Kosovë, tha se është privilegj të jesh diplomat amerikan në Kosovë. “Nuk ka ndonjë shtet tjetër në botë ku Shtetet e Bashkuara priten aq ngrohtë dhe aq sinqerisht si në këtë shtet, ku një person mund të jetë përfaqësues i një shteti, por po ashtu ta ndjejë dashurinë e popullit të atij vendi në të cilin ai është akredituar”, tha ai.

Ambasadori Chrisopher Dell, është diplomati amerikan që më së gjati ka qëndruar në Kosovë. Ai qenë fillimisht shef i Zyrës Amerikane nga periudha 2001 deri 2004, për t’u kthyer sërish në Kosovë e pavarur si ambasador amerikan në vitin 2009.