“Milan Junior Camp” rikthehet në Kosovë

Pesë fëmijë nga Kosova do të jenë në trajnime në “Milan Day” me të gjithë fëmijët e përzgjedhur nga mbarë bota në stadiumin “San Siro” në Milan.

Shtatë trajnerë të futbollit, të grupmoshave të vogla, kanë ardhur në Kosovë nga klubi më i famshëm italian e evropian “Milano” për të gjurmua talent të ri të futbollit. Ata do të qëndrojnë deri në fund të javës në Kosovë, ndërsa trajnimet do të zhvillohen në Stadiumin “Adem Jashari” në Mitrovicë.

Në një konferencë për media që u mbajt në hotel ”Emerald” në Prishtinë, në stërvitjet e futbollit do të marrin pjesë rreth 200 fëmijë kosovarë, të përzgjedhur në bazë të paraqitjeve vullnetare. Ata që marrin notat më të larta nga trajnerët italian, do të udhëtojnë me vonë për në Milano.

“Po kthehemi në Kosovë sepse kemi pasur sukses në kampin e vitit të kaluar”, tha Marco Schembri, përfaqësues i trajnerëve të Milaim Junior Camp. Ai bëri të ditur se kampi i milanezëve të rin ka filluar dy muaj e gjysmë më parë nëpër disa vende të botës, ndërsa Kosova është stacioni i fundit.

Ai tha se pesë fëmijë nga Kosova, që zgjidhen më të mirët, do të jenë në trajnime në “Milan Day” me të gjithë fëmijët e përzgjedhur nga mbarë bota në stadiumin “San Siro” në Milano.

Në konferencën për media kanë marrë pjesë edhe përfaqësuesit e Grupit "Taçi Oil.

International" nga Shqipëria e cila është sponsore zyrtare e “AC Milan” si dhe drejtuesit e Ministrisë së Kulturës, Rinisë dhe Sportit. “Duam të vazhdojë në mënyrë konstante, që të realizohen ëndrrat e fëmijëve për futbollin”, tha Anika Taçi, zëvendëspresidente e Kompanisë “Taçi Oil”.