200 tituj të botuesve kosovarë në Panairin e Frankfurtit

Shtëpitë botuese nga Kosova e kanë konfirmuar pjesëmarrjen e tyre në ngjarjen më të madhe të librit në botë, në Panairin e sivjetmë të Librit në Frankfurt.

Afërsisht 200 tituj do të prezantohen në Panairin katërditor të Librit në Frankfurt - edicioni i 62-të i të cilit hapet me 10 tetor.

25 shtëpi botuese dhe institucione që botojnë libra do të prezantohen në stendën e Shoqatës së Botuesve të Kosovës.

“Secila prej shtëpive botuese ka të limituar numrin e titujve prej 15 sosh”, ka thënë ka thënë Besian Zeneli, nënkryetar i Shoqatës së Botuesve të Kosovës, raporton Koha.

Por ka edhe shtëpi botuese të cilat do të prezantohen edhe më pak tituj. “Kësisoj, gjithsej janë afërsisht 200 tituj”, ka shtuar Zeneli 

Titujt të cilët do të prezantohen sivjet janë edhe ato të Akademisë së Shkencave dhe Arteve të Kosovës, Institutit Albanologjik, Institutit të Historisë, Lidhjes së Shkrimtarëve të Kosovës, Universitetit të Prishtinës dhe të shtëpive të tjera botuese si „KOHA“,“AIKD’99”, “Alb-Med”, “Albas”, “Anton Pashku”, “Artini”, “Bss”, “Cuneus” “Dukagjini”, “Faik Konica”, “Drita”, “Dija”, “Mendimi Pozitiv”, “Rugova Art”, “Tenda Titanik” dhe “Zëri”.