Ambasadorët e rinj, tre muaj po rroga

Ambasadorët e rinj kosovarë nuk kanë marrë rroga gjatë tre muajve të fundit, raporton gazeta "Zëri" duke u thirrur në burimet e veta brenda Qeverisë së Kosovës. Edhe Ministria e Punëve të Jashtme e pranon se ambasadorët e rinj nuk kanë marrë paga për disa muaj, por thotë se kjo ka ndodhur për çështje teknike.

"Është thjeshtë skandaloze", i ka thënë 　gazetës "Zëri"një zyrtar i lartë i qeverisë, duke e konsideruar skandaloz këtë veprim, që diplomatët kosovarë të mbesin pa paga për më shumë se 100 ditë. 　　

"Siç jeni të informuar, në disa prej ambasadave të Kosovës, janë bërë disa rotacione të ambasadorëve dhe kjo situatë ka bërë që në një rast të ndodhë një vonesë e shkurtër në çështjen e pagesës, dhe kjo për të vetmen arsye, çështjen e kompletimit të dokumenteve dhe procedurat teknike, e jo për arsye buxhetore", ka thënë Uliks Emra, U.D. i Drejtorit të Përgjithshëm në Ministrinë e Jashtme.

Ai ka thënë se nuk ka vend për shqetësime dhe të gjitha pagesat eventuale janë vonuar për shkak të procedurave ekskluzivisht teknike.

"Ka pasur raste kur Ambasadori i Amerikës është dashur të paguaj me kartelën e tij personale të kreditit, vet shërbimet e ambasadës. Është thjeshtë skandal çfarë ka ndodhë", ka thënë një zyrtar i qeverisë i kontaktuar nga Zëri. Akan Ismajli, ambasadori i ri në Uashington, i cili momentalisht është me pushime në Kosovë, nuk ka pranuar të thotë asgjë kur është kontaktuar nga gazeta.　

Ndërsa Emra i MPJ-së ka thënë se asnjë ambasador nuk është detyruar që të kryejë pagesa për shërbimet e Ambasadës prej mjeteve të veta personale. "Në çdo mision diplomatik, përkatësisht konsullor, ekzistojnë kartelat zyrtare bankare për shfrytëzimin e të cilave me qëllim të kryerjes së shërbimeve zyrtare", thotë ai.