AUV, alarmon për cilësinë e dobët të produkteve ushqimore në Kosovë

Institucionet përgjegjëse për shëndetin publik dhe cilësinë e ushqimit në Kosovë, alarmojnë për kushtet e dobëta higjienike-sanitare, sidomos sektorët ku bëhet përgatitja e ushqimeve.

Sipas një inspektimi të fundit të Agjencisë së Ushqimit dhe Veterinës (AVUK), probleme të mëdha u evidentuan në rajonin e Gjilanit dhe të Ferizajt, ku prej 242 inspektimeve në lokale të ndryshme, analizat treguan se shumë prej tyre nuk i plotësonin as kushtet elementare higjieniko-sanitare, njofton kjo agjenci.

“Pas ekzaminimit të mostrave në laboratorët e mikrobiologjisë, në disa raste janë izoluar baktere që tregojnë për ambiente të kontaminuara të punës në hapësirat ku përgatitet ushqimi, në mjetet e punës apo te personeli. Në pjesën dërrmuese të lokaleve afariste, stafi i punës në këto lokale nuk mban higjienë personale”, thuhet në një njoftim për media të AVUK-ut.

Inspektorët gjetën edhe raste kur personeli nuk është i kontrolluar në bacilbartje të rregullt gjashtëmujore, si dhe pajisja me libreza sanitare ishte me afat të skaduar.Madje, aq e rënduar ishte gjendja në disa prej lokaleve, saqë AVUK-u inicioi edhe procedurë gjyqësore për disa prej tyre.

Përveç higjienës, konsumatorët në Kosovë janë të rrezikuar seriozisht edhe nga produktet me cilësi të dyshimtë dhe afat të skaduar, njofton më tej Agjencia e Ushqimit dhe e Veterinës.

Ndryshe, një organizatë joqeveritare “Konsumatori”që pretendon të mbrojë interesat e konsumatorit kosovar, ka ngritur qyshkur shqetësime lidhur me cilësinë e dobët të produkteve ushqimore në Kosovë. Përfaqësuesi i kësaj organizate, Selatin Kaçaniku, ka thënë se rastet e zbuluara nga inspektorati tregojnë më së miri për mundësinë që shumë produkte të dyshimta deri më tani kanë shkuar të konsumatorët pa u vërejtur fare.