Ban Ki Moon bën thirrje për dialog

Sekretari i Përgjithshëm i OKB-së, Ban Ki Moon takoi përfaqësuesit e institucioneve të Kosovës, kryeministrin Hashim Thaçi dhe presidenten Atifete Jahjaga. Ai fillimisht u shpreh i shqetësuar me situatën e sigurisë në veri të vendit, ndërsa kërkoi zgjidhje nëpërmjet dialogut. Po ashtu ai tha se negociata me Beogradin duhet të vazhdojnë.Ban Ki Moon, është sekretari i parë i OKB-së që viziton Kosovën e pavarur. Ai ashtu siç e kishte parashikuar anashkaloi takimet ku ishte i pranishëm flamuri i Republikës së Kosovës, që dëshmon shtetësinë. Megjithatë gjatë takimit me presidenten Jahjaga, atij i doli nga protokolli një fotografim ku ishte varur në mur deklarata e pavarësisë dhe fotografia e komandantit legjendar të UÇK-së, Adem Jashari. “Unë mbetem i shqetësuar për situatën në veri të Kosovës..por, është esenciale që çështjet e ndjeshme dhe komplekse që kanë të bëjnë me veriun e Kosovës të zgjidhen përmes dialogut paqësor”, ka deklaruar Ki moon.

Ai tha se liderëve dhe popullit të Kosovës u ka sjell mesazhin e njëjtë, për një të ardhme paqësore dhe të begatë. “Unë pres përpjekje të fuqishme drejt normalizimit të marrëdhënieve me Beogradin, përmes përkushtimit serioz dhe të sinqertë në dialog. Këtë e kam kërkuar edhe nga lidershipi serb gjatë vizitën në Beograd”, ka thënë ai.Presidentja Atifete Jahjaga e falënderoi Sekretarin e Përgjithshëm Ban Ki Moon për angazhimin personal të tij për Kosovën dhe për proceset demokratike të vendit. Ajo e vlerësoi punën dhe ndihmën e misionit të OKB-së në Kosovë, UNMIK, posaçërisht në periudhën e rindërtimit, të tranzicionit dhe të shtetndërtimit.“Mandati i KB në Kosovë është një nga mandatet më të suksesshme në gjithë historinë e Kombeve të Bashkuara dhe është një nga misionet më të pranuara nga populli dhe nga të gjithë qytetarët”, tha Jahjaga, duke bërë të ditur se Republikën e Kosovës shtet sovran dhe i pavarur, faktor paqeje dhe stabiliteti në rajon.“Që nga fillimi të dyja palët kemi qenë të vetëdijshme se misioni nuk është këtu për vetveten, por se ai ka krijuar rrethanat e deklarimit të vullnetit të lirë të popullit për të ndërtuar të ardhmen e vet. Ky vullnet u pranua nga Gjykata Ndërkombëtare e Drejtësisë në Hagë, e cila u shpreh se është në harmoni të plotë me Rezolutën 1244 të KS të OKB-së të 10 Qershorit 1999 dhe me ligjet ndërkombëtare|, tha Jahjaga.Duke folur për proceset integruese të vendit, presidentja Jahjaga theksoi se Kosova i takon Evropës dhe anëtarësimi në BE në NATO dhe në OKB është mënyra më e mirë për të kryer reformat demokratike në vend. “Integrimi në BE do të na ndihmojë që njëherë e përgjithmonë ta lëmë të kaluarën dhe të bashkohemi rreth së ardhmes sonë të përbashkët si vende të pavarura. Ky do të ishte garantuesi më i mirë që paqja të triumfojë në rajon”, tha Presidentja Jahjaga.Duke folur për gjendjen në tri komunat në veri të Kosovës, Presidentja Jahjaga theksoi se veprimi i strukturave ilegale dhe kriminale në këtë pjesë të vendit, po mbajnë peng edhe qytetarët e zakonshëm serbë në këtë pjesë të vendit. Ajo tha se institucionet e Kosovës janë të përkushtuara që të punojnë së bashku me partnerët ndërkombëtarë për t’iu ofruar qytetarëve serbë të Kosovës dhe të bisedojnë me ta për zgjidhjen e të gjitha çështjeve.“Nuk ka alternativë tjetër përveç zhbërjes së strukturave ilegale dhe kriminale në tri komunat në veri të Kosovës, që tentojnë të mbajnë peng stabilitetin e plotë të vendit dhe që minojnë përparimin e përgjithshëm të arritur në rajon”, tha Presidentja Jahjaga.Ndërsa kryeministri Hashim Thaçi tha se sekretari i OKB-së është i njoftuar me situatën e re dhe rrethanat në Kosovë, ndërsa vizitën e Banit e konsideroi historike. “Është një vizitë jashtëzakonisht e rëndësishme dhe historike për Republikën e Kosovës, është vizita e parë që ndodh prej një sekretari të përgjithshëm të OKB-së në shtetin e pavarur dhe sovran të Kosovës. Është një mesazh i mbështetjes së progresit të Kosovës”, ka thënë Thaçi, sipas të cilit, Ban Ki Moon njeh realitetin në Kosovë dhe respekton atë.Megjithatë Thaçi ka qenë më i prerë në deklaratën e tij rreth dialogut. Ai tha se OKB nuk do ketë rol në këtë dialog, duke hedhur poshtë gjithashtu përfshirjes së UNMIK-ut në dialogun për veriun. “Ne kemi pasur dialog teknik edhe me shtete të tjera, ndërsa në këtë që e kemi nisur vjet me Serbinë, OKB nuk do ketë rol. Unë ju kam prezantuar idetë preliminare të planit tim për integrimin e serbëve të veriut në jetën institucionale të Kosovës. Ato ide u janë bërë të ditur të gjithë faktorëve relevantë të botës, ndërsa roli i OKB-së është i tejkaluar”, ka thënë Thaçi.Sekretari i OKB-së në vizitën njëditëshe në Kosovë ka vizituar edhe manastirin ortodoks të Deçanit si dhe qytetin e Prizrenit.