Berlin: Krasniqi përballë turkut Sahin

Boksieri kosovar Haxhi (Robin) Krasniqi të shtunën (sonte) do të boksoj kundër turkut Serdar Sahin.

Nga 7 Janari, kur edhe e mbrojti titullin e Evropës ndaj Hakim Zoulikha, Krasniqi nuk e ka zhvilluar asnjë duel. Megjithkëtë kosovari është gati për duelin e së shtunës, i cili do të zhvillohet në Berlin, në arenën "O2 World".

"Mezi po e pres të ngjitem në ring dhe të fitoj titullin e radhës, ka kohë që nuk kam boksuar, mirëpo jam i përgatitur shumë mirë dhe i gatshëm që tani të ngjitëm në ring. Shpresoj se do të ketë sa më shumë shikues shqiptarë në sallë dhe do ta tregoj një luftë të shkëlqyeshme me një rezultat po aq të mirë" ka deklaruar Krasniqi për albanianboxing.com.

Krasniqi, i cili radhitet i pesti në ranglistën e WBO’së, gjatë karrierës ka zhvilluar 39 duele. Prej tyre ka fituar 37 (13 me nokaut) ka humbur dy herë derisa nuk ka barazuar asnjëherë.

Kurse Serdar Sahin i ka zhvilluar 20 duele dhe i ka fituar të gjitha (13 me nokaut), kurse deri tani ka luftuar në një kategori më të rëndë, në Cruiserweight, dhe për këtë fakt ai do të jetë kundërshtarë edhe më i vështirë për boksierin shqiptarë.