Brukseli të jetë unik ndaj Kosovës

Ish-presidenti i Finlandës dhe njëherit arkitekti i pavarësisë së Kosovës, Marty Ahtisari i bëri thirrje Bashkimit Evropian që të jetë me fleskibil dhe me i hapur në relacion me Kosovën. Ai tha se është e padobishme që BE të ketë qasje unifikuese në politikën e brendshme, ndërsa qasje tjetër në politikën e jashtme.

Ahtisaari, i cili mori çmimin “Nobel” për Paqe tha se Kosova duhet të jetë një tregim suksesi i BE-së. “Kosova është këtu dhe Bashkimi Evropian duhet ta përfshijë atë në masat e saja politike dhe ekonomike. Nëse nuk bëhet kjo, do të mbetet një problem permanent për themelet e rajonit evropian”, u shpreh Ahtisari.

Ai këto komente i bëri gjatë konferencës “Kaptinë e mbyllur në Ballkan” e organizuar nga qeveria e Kosovës me rastin e përmbylljes së mbikëqyrjes ndërkombëtare të pavarësisë së Kosovës. “Shpresoj që të gjithë anëtarët e BE-së të kuptojnë se Kosova duhet të respektohet si pjesë e partnerëve evropianë”, tha ai.

Ish presidenti Ahtisari, i cili edhe hartoi pavarësinë e mbikëqyrur, u angazhua për vazhdimin e negociatave me Serbinë, për zgjidhjen e çështjeve pazgjidhura ndërmjet dy vendeve. “Ne duhet të flasim më pak për arritjen e paqes si rezultat dhe më shumë për sjelljen dhe qasjen ndaj paqes”, tha Ahtisari.