Bundestagu ka hapur dyert për të rinjtë nga Maqedonia

Në Maqedoni është bërë përzgjedhja e kandidatëve që kanë konkurruar për bursën ndërkombëtare parlamentare.

Politikanët e rinj do të njihen me sistemin politik të Gjermanisë, duke u angazhuar në zyrat e deputetëve gjermanë.

Kandidatë nga 28 shtete konkurrojnë për të fituar bursën ndërkombëtare parlamentare të Bundestagut gjerman, e cila mundëson nga afër të njihet sistemi parlamentar i Gjermanisë. Deputetja e Bundestagut, Marija Flashbarth, ka qëndruar në Shkup gjatë përzgjedhjes së kandidatëve nga Maqedonia për bursën ndërkombëtare parlamentare.

“Qëllimi i Bundestagut është që nëpërmes kësaj burse të forcohet bashkëpunimi dhe t’u ofrohet mundësia të rinjve që të njihet me sistemin politik të Gjermanisë”, tha Flashbarth, raporton DW.

Programi IPS u mundëson studentëve qëndrim falas në Bundestagun gjerman dhe punë të drejtpërdrejtë në zyrat e deputetëve të Bundestagut, thotë ambasadorja e Gjermanisë në Shkup, Gudrun Shtajnaker.

“Qëndrimi në parlamentin gjerman është kontribut i madh për studentët, të cilët pas kthimit në vendet e tyre do të ndihmojnë për zhvillimin e institucioneve të mirëfillta demokratike”, thotë diplomatja Shtajnaker.

Gjatë qëndrimit në Maqedoni delegacioni i Bundestagut zhvilloi takime edhe me ish- bursistët që tani janë të organizuar në shoqata të ndryshme për të përforcuar dialogun ndërkulturor dhe për të ndërtuar rrjetin e komunikimit.

Anife Latifi thotë se eksperiencën e fituar në Bundestag është munduar ta praktikojë në punën e përditshme, mirëpo sipas saj, në Maqedoni institucionet nuk i vlerësojnë aq sa duhet specializimet jashtë vendit.

“E respektojnë, por nuk e kuptojnë se çfarë stipendioni është ky. Mendoj se ende nuk janë aq të informuar se çfarë përvoje sjellim ne prej andej”, thotë Latifi.

Fituesit e bursës ndërkombëtare parlamentare do të filojnë punën praktike në Bundestag në mars të vitit të ardhshëm.