Carla del Ponte mund të hetojë në Siri

Sipas Ministrisë zvicerane për Punë të Jashtme, Zvicra mund t’i propozojë Këshillit për të drejtat e njeriut të OKB-së ta kyçë ish-prokuroren e përgjithshme të Gjykatës Penale Ndërkombëtare për ish-Jugosllavi që të hetojë për masakrat në Siri, njofton e përditshmja zvicerane «Le Temps».

Kjo informatë është bërë e njoftur të hënën në mbrëmje nga zëdhënësi i Ministrisë për Punë të Jashtme të Zvicrës. «Zvicra angazhohet në mënyrë intensive që dhunimet e të drejtave të njeriut në Siri të jenë objekt i hetimeve dhe ndjekjes», ka nënvizuar për Radio Televizionin Zviceran (RTS) zëdhënësi Tilman Renz.

Zvicra «mobilizohet që mandati i Komisionit hetimor të zgjatet», ka shtuar ai. Veç kësaj, ai ka nënvizuar se prandaj «Zvicra propozon që zonja Del Ponte të vijë ta mbështesë punën e Komisionit», ka përfunduar z. Renz.

Ish-prokurore e përgjithshme e Tiçinos dhe pastaj e Konfederatës zvicerane, Carla del Ponte, është dalluar me hetimet e saj këmbëngulëse në Gjykatën Penale Ndërkombëtare të Hagës për krimet e luftës së ish-Jugosllavisë (1999-2007). Ajo ka qenë po ashtu Prokurore e Përgjithshme e Gjykatës Penale Ndërkombëtare për Ruandë. Nga viti 2008 deri më 2011ajo ka qenë ambasadore e Zvicrës në Argjentinë.