Clinton e Ashton kërkojnë vazhdimin e negociatave

Pavarësisht se është pritur me protesta në Beograd, sekretarja amerikane e Shtetit, Hillary Clinton ka mbështetur procesin integrues të Serbisë në Bashkimin Evropian si dhe ka inkurajuar vazhdimin e procesit negociator ndërmjet Prishtinës dhe Beogradit. Ajo ka thënë se vizita në Beograd nuk nënkupton presionin për njohjen e pavarësisë së Kosovës.

“Nuk kemi ardhur këtu që të paraqesim kushte apo të ushtrojmë kontroll”, ka thënë Clinton, e cila gjatë vizitës në Ballkan është shoqëruar edhe nga shefja e BE-së për politikë të jashtme dhe siguri, Catherine Ashton. Në Beograd, Clinton është takuar me presidentin e Serbisë, Tomislav Nikoliq dhe kryeministrin serb, Ivica Daçiq.

“Shtetet e Bashkuara apelojnë tek të gjitha palët që t’i zbatojnë marrëveshjet e arritura, t’i aplikojnë masat konkrete për normalizimin e marrëdhënieve”, ka thënë Clinton, duke shtuar se SHBA dëshiron ta shoh jetësimin e të gjitha aspiratave të Serbisë dhe të gjitha vendeve të rajonit, në rrugën e tyre drejt BE -së dhe NATO-s.

Sekretarja amerikane e Shtetit ka përshëndetur zhvillimin e bisedimeve në nivel politik ndërmjet Prishtinës dhe Beogradit, duke e konsideruar si një mundësi të mirë për vazhdimin e dialogut për çështje thelbësore.  “Jemi marrë vesh që ta vazhdojmë dialogun dhe kemi planifikuar që së shpejti të takohemi sërish. Është jetike që të dyja palët në plotëni t’i zbatojnë të gjitha marrëveshjet”, ka thënë Ashton, raporton TG.

Para vizitës në Beograd, sekretarja Cklinton ka qëndruar në Sarajevë, ku i ka dhënë mbështetje integrimit të këtij shteti në BE. Ndërsa stacioni tjetër i saj është Prishtina. Ajo të mërkurën do t’i takojë përfaqësuesit e shtetit kosovar, presidenten Atifete Jahjaga dhe kryeministrin Hashim Thaçi. Kjo vizitë mbi të gjitha ka për qëllimin shtytjen përpara të procesit të bisedimeve Kosovë-Serbi.