Për gjashtë muaj, 700 milionë € nga diaspora

Mërgimtarët shqiptarë të Maqedonisë vetëm për gjashtë muajt e kaluar kanë sjellë në venin e tyre rreth 700 milionë euro, mjete këto që janë destinuar për investime dhe nevoja familjare.Këto mjete, siç raporton agjencia INA, përbejnë rreth 5 për qind në Bruto Prodhimin e Përgjithshëm Vendor të Republikës së Maqedonisë.

Kjo shumë konsiderohet shumë më e vogël për dallim nga vendet e tjera të rajonit. Studimi lidhur me paratë e diasporës në vendet e Ballkanit është bërë nga agjencia turke e lajmeve Anadollia. Sipas kësaj agjencie, këto mjete ndikojnë tejmase në buxhetet shtetërore të këtyre vendeve në Evropën Juglindore.

Sipas të dhënave të Bankës Botërore, diaspora më shumë mjete derdh në Bosnjë, më pas vjen Serbia. “Diaspora në këto vende merr pjesë me 13 për qind në Bruto Prodhimin Vendor”, thuhet në raport.

Diaspora shqiptare, ndërkaq radhitet në vendin e tretë me 11 për qind të Bruto Prodhimit Vendor.

Në vitin 2010 në Serbi, sipas këtij raporti, kanë hyrë 5,6 miliardë dollarë nga diaspora, në Shqipëri 1,3 miliardë dollarë, në Kroaci 1,6 miliardë dollarë dhe Bosnjë Hercegovinë 2,2 miliardë dollarë, ndërsa në Kosovë, sipas bankës Qendrore të Kosovës, kanë hyrë rreth 600 milionë euro.

Pavarësisht këtyre shifrave, disa herë është thënë se diaspora shqiptare luan një rol të rëndësishëm në ngritjen e mirëqenies sociale dhe në zhvillimin ekonomik të Kosovës, Maqedonisë dhe Shqipërisë. Përqindja më e madhe e remitancave, sipas ekspertëve të ekonomisë, shkon në amvisëri, me rreth 90 për qind.