Potenciali i madh i diasporave

Një numër i magazinës prestigjioze The Economist kushtuar rrjeteve të diasporave në botë, para do kohësh ka vënë theksin në rëndësinë ekonomike gjithnjë e më të madhe si dhe në kontributin e tyre në rritjen ekonomike.

Diasporat gjithnjë kanë përbërë një forcë mbështetëse ekonomike të konsiderueshme. Mobiliteti i madh i kapitalit, rënia e dukshme e kostos së transportit si dhe progresi teknologjik kontribuojnë në rritjen e këtij fenomeni. Anëtarët e diasporës që i përkasin gjeneratës së parë përfaqësojnë 3% të popullatës botërore. Vlerësohet se diaspora e një vendi, sikurse Kina, është më e rëndësishme në numër se vetë popullata e Francës!

Një pasuri e madhe e këtyre rrjeteve diasporike me prejardhje të ndryshme dhe të shpërndara në të katërt anët e botës është fakti se i lehtësojnë shkëmbimet ndërkombëtare, por edhe shpërndarjen e informatave si dhe të ideve për mundësitë e investimeve, edhe atë sikurse në vendin e prejardhjes, ashtu edhe në vendin pritës.

Në Zvicër, si vend imigrimi, në një realitet transnacional jetojnë një mori popujsh. Tema e migrimit është, për fat të keq, shpeshherë e asociuar vetëm si problem. Retorika politike ka ndonjëherë tendencë për ta fshehur kontributin historik të migracionit, sidomos sa i pëket jetës ekonomike të këtij vendi.

Pa rënë në kurthin e uniformizimit të profileve shoqërore si dhe kulturore apo të vështrimit engjëllor të popullatave migruese, ndoshta është koha të shihet në këto komunitete një potencial për promovimin e investimeve si dhe të ekonomisë zvicerane jashtë vendit.

Duke iu referuar diasporës kineze në SHBA si dhe investitorëve amerikanë në Kinë, migrantët që janë të punësuar në firmat helvetike do të mund të bëheshin kështu si aktorë çelës të ngulitjes së tyre në tregje të reja si dhe me rritje të hovshme.

Personat që dalin nga diasporat në Zvicër, veçanërisht ata të gjeneratës së dytë apo të tretë, kanë shpeshherë shkollim të shëndoshë si dhe kanë njohuri rreth specifikave ekonomike e financiare të vendit të tyre pritës. Avantazhi i tyre krahasues është fakti se ata përfitojnë po ashtu nga informatat ekonomike të privilegjuara në raport me nevojat si dhe mundësitë e vendit të tyre të prejardhjes si dhe të regjionit nga ata vijnë. Më konkretisht, fakti që ata gëzojnë njohje gjuhësore, por edhe i kanë rrjetet e tyre si dhe afinitetet kulturore i bënë ata të dallojnë nga të tjerët.

Të investosh në diasporë është të qëllosh dy caqe me një gur. Në njërën anë, të promovosh interesat ekonomike zvicerane jashtë vendit si dhe, në anën tjetër, të kontribuosh në tranzicionin ekonomik të vendeve në zhvillim. Çfarë ka më efikase për ta parandaluar fluksin e migrimeve ?

Botuar në “24 Heures”, 28-29 janar 2012