Pritet të rinis sot dialogu Kosovë- Serbi

Në Bruksel pritet që sot të rinis dialogu i ndërprerë për një kohë ndërmjet Kosovës dhe Serbisë.

Të dyja palët tashmë e kanë konfirmuar pjesëmarrjen, kurse ndërmjetësi evropian në proces, Robert Cooper, ka bërë publike çështjet që do të diskutohen.

Sipas tij, do të bisedohet edhe për protokollin teknik për menaxhimin e integruar të kufijve, dhe zbatimin e marrëveshjeve. 　

Kurse, Kryeministri Hashim Thaçi ka zhvilluar mbrëmë një takim me ambasadorët e vendeve të Kuintit.

Në një deklaratë për RTK-në ambasadori gjerman, Ernest Rejnhel, ka thënë se marrëveshja për bashkëpunim rajonal do të jetë një avancim për Kosovën. Refuzimi i propozimit që Kosova përmes fusnotës t’i referohet tri dokumenteve, sipas tij, nuk do t’i shërbente vendit.　

Ndërsa Catherine Ashton, William Hague e Carl Bild i telefonuan Hashim Thaçit. 　Ata kërkuan nga pala kosovare që ta nënshkruajë marrëveshjen me Serbinë për përfaqësimin e vendit në nismat rajonale, në shkëmbim të hapjes së perspektivës evropiane të Kosovës.

"Kryeministrit Thaçi i është rikonfirmuar nga të gjithë bashkëbiseduesit se Kosova do të ketë mbështetje të pa rezervë në realizimin e agjendës së saj evropiane dhe euro-atlantike. Gjithashtu kryeministri Thaçi ka marrë urime me rastin e përvjetorit të katërt të Republikës së Kosovës, si dhe e përgëzuan për të arriturat që ka bërë Kosova në kuadër të këtyre katër viteve", thuhet mes tjerash në njoftim e Qeverisë.