Shkupi, arenë e përleshjeve ndërmjet tifozëve

Kryeqyteti i Maqedonisë, Shkupi ka qenë mbrëmë arenë e përleshjeve ndërmjet tifozëve  serbë në njërën anë dhe atyre shqiptarë anën tjetër. Serbët që kishin ardhur për të mbështetur kombëtaren e tyre në lojën kundër Maqedonisë, janë përleshur me qytetarët shqiptarë të Shkupit pas provokimeve të serbëve. 

Ky incident, i parë ndëretnik ndërmjet shqiptarëve dhe serbëve, ka rezultuar me disa tifozë të lënduar, madje është raportuar se një tifozë serbë është therur me thikë nga persona tashmë të panjohur për policinë. 

Të plagosurit, siç raportojnë mediat në Shkup, menjëherë janë dërguar në një spital, por plagët e tyre nuk janë konsideruar të rrezikshme për jetën. Policia është vënë në kërkim të autorëve të këtij sulmi. 

Në mbrëmjen e të martës, është regjistruar edhe një incident tjetër, ku tifozët serbë në sheshin “Maqedonia” kanë sulmuar me shishe birrash një grup të rinjsh maqedonas që mbanin flamurin e Maqedonisë dhe ishin tifozë të kombëtares. Ndërhyrja e policisë ka bërë që të evitohet përleshja midis këtyre grupeve të tifozëve. 

Ky, ndërkaq nuk ka qenë incidenti i vetëm. Një incident tjetër po ashtu është raportuar në çarshinë e Vjetër të Shkupit, ku dy të rinj serb nga Podgorica e Malit të Zi, pas provokimeve që iu bënë banorëve të kësaj lagje, u sulmuan nga një grup të rinjsh. 

Ndryshe, në lojën e mbrëmshme, të vlefshme për kualifikim në botërorin Brazili 2014, Maqedonia e ka mposhtur Serbinë me rezultat 1:0.

Ndërkohë, menjëherë pas përfundimit të ndeshjes, një turmë tifozësh serbë, një pjesë e tyre të maskuar, të shoqëruar edhe nga tifozë vendor nga stadiumi “Filip II”, ishin nisur drejt Çarshisë së Vjetër, për që ishin ndaluar nga njësitë policore speciale.

Që të pengohet ky grup huliganesh policia ka qenë e detyruar të përdorë gazin lotsjellës.

Ndërkaq, në Çarshinë e Vjetër, siç raporton INA, janë regjistruar xhama të thyer, shishe dhe çadra të hedhura nga lokalet e afërta.

MPB mbrëmë po ashtu ka aplikuar një regjim të kufizuar të lëvizjes së lirë të qytetarëve, duke shmangur rrugët drejt sheshit qendror të Shkupit dhe stadiumit “Filipi II”.