Vetëvendosje “shet” shtëpinë e kryeministrit

Aktivistët e Lëvizjes Vetëvendosje kanë vazhduar të martën me një aksion tjetër kundër privatizimit  të ndërmarrje publikë, PTK-së, Trepçës dhe KEK-ut. Ata nëpërmjet një aksionin simbolik me moton “Shitet prona, 26.300 euro”, duke pretenduar shitjen e pronës së kryeministrit Hashim Thaçi. Me këtë rast, ata akuzojnë Thaçin se po e shet lirë tokën e Kosovës.

 “Duke qenë pronë e publikut, pronë e të gjithë neve, atyre që kanë qenë para nesh dhe atyre që do të vijnë pas nesh, vendimin për privatizimin e kompanive publike do të duhet ta merrnin vetëm qytetarët e Kosovës. Për më tepër kjo qeveri nuk ka legjitimitet politik për t’i privatizuar këto kompani...”, ka thënë Aktivistja Etleva Malushaj.

Sipas saj, prona publike është diçka që nuk bëhet private, ndërkaq kompanitë publike do të duhej të ishin kompani të paprivatizueshme. “Ato duhet të jenë interes kombëtar, strategjik e interes ekonomik dhe si të tilla duhet të mbesin publike” tha ajo, duke akuzuar Qeverinë se po i shet “falë” pasuritë kombëtare. 

“Ne i themi kryeministrit dhe ministrave që obligimet e tyre t’i kryejnë duke e shitur pronën e tyre private e mos ta privatizojnë pronën tonë të përbashkët e të mirën tonë të përgjithshme, për shkak se e mira jonë e përgjithshme, hapësira jonë publike dhe kompanitë tona publike nuk duhet të jenë pre e një qeverie e cila as legjitimitetin më të vogël politik nuk e ka për të qenë aty”, konsideron Malushaj.

Ndryshe, disa ditë rresht përmes aksioneve të ndryshme, Vetëvendosje ka kundërshtuar privatizimin e ndërmarrjeve publike. Ata një ditë më pari i kanë dërguar qindra SMS dhe e-mailave kryeministrin Thaçi dhe tre ministra të tij, Besim Beqaj, Mimiza Kusari-Lila dhe Bedri Hamza, duke iu rekomanduar që të mos e privatizojnë KEK-un, PTK-në dhe Trepçën.