Pushimet e mërgimtarëve, atdheu dhe bregdeti

Një pjesë e madhe e atdhetarëve tanë në mërgim e kanë preferuar të kursejnë një pjesë e të hollave gjatë vitit nga të ardhurat e veta, në mënyrë që nga ato kursime të bëjnë pushime verore, që të pushojnë e të kënaqën dhe ato të holla ti shpenzojnë në vendlindje, apo në ndonjë vend bregdetar shqiptarë. Kur e përmendim vendlindjen, ne kosovarët e kuptojmë Kosovën si vendlindje e atdhe, ndërsa bregdetin shqiptarë, kuptojmë vendet tona bregdetare në Shqipëri. Shqiptarët i përdorin dy fjalë të bukura, dy fjalë të ëmbla, a t dh e e m ë m ë dh e, që ndër popuj tjerë nuk ekziston ky privilegj. Prandaj, shqiptarët vendin e tyre e quajnë atdhe e mëmëdhe, por si do qoftë, njëri dhe tjetra janë të njëjta, nga se janë të njëjtës hapësirë, dhe lidhje gjaku e shpirtërore, ekonomike e kulturore. Atdhe e mëmëdhe, është vendi dhe tërësia shpirtërore e njeriut, ku kënaqet në saje të dashurisë që ka për të, dhe shpirti i vazhdimësisë së qëndrueshme, që na mbanë e na ruajnë në vete, dashurinë, dhembjen dhe largësitë e shpërndara nëpër botë.

Kosova- për ne kosovarët është vendi më i bukur në botë, prandaj pushimet verore janë të mirë se ardhura në këtë vend, aty ku e kemi gjenezën tonë, aty i kemi të afërmit tanë, të cilët na presin me padurim. Në Kosovë i kemi edhe alpet e bukura shqiptare, Bjeshkët e Sharit, Bjeshkët e Rugovës, Bjeshkët e Junikut, Bjeshkët e Gjerovicës, Bjeshkët e Nëmura,Bjeshkët e Burimit dhe shumë bjeshkë të tjera, ku vizitorët kanë mundësi ti shijojnë këto vende të bukura turistike, ku të kënaqët syri e shpirti dhe me freskinë e ajrit e ujin e kulluar, që rrjedh nga shkëmbinjtë e lartë, aty, këtu të mbuluara me borë. Në Kosovë ka edhe shumë lumenj, të cilët janë nga burime të ndryshme dhe plot liqej të vegjël natyrorë, që nga malet e Sharit deri te Alpet tjera shqiptare. Drini i bardhë, lumi më i gjatë në vend, me një gjatësi prej 122 km, pothuaj se e freskon një pjesë të madhe të Kosovës, mandej Lumi Mirusha dhe Ujëvara e saj, që tërheq me qindra vizitor të vendit dhe nga vendet e ndryshme. Bukuritë e Kosovës nuk kanë mbarim, të cilat vizitori, apo pushuesit mërgimtarë, që e kanë kohën e kufizuar të pushimeve, nuk munden ti shijojnë të gjitha bukuritë për një kohë aq të shkurtër.

-Shumica e bashkëkombësve tonë, qoftë nga mërgimi dhe nga viset tjera shqiptare, pushimet verore i kalojnë në bregdetin e bukur shqiptarë. Vera turistike në Shqipëri, për dallim nga vitet tjera, këtë vit është edhe më e organizuar dhe në rrethana më të volitshme për turistin dhe pushuesit. Hapja e segmentit rrugorë e rrugës që bashkon kombin shqiptarë, Autostrada Durrës-Morinë, përmes tunelit të mrekullueshëm të Kalimashit, i cili afron edhe më tepër Kosovën dhe viset tjera shqiptare me Adriatikun, duke joshur edhe plot turistë nga vendet e ndryshme të botës.

Të gjitha vendet bregdetare, duke filluar nga Saranda, Durrësi, Shëngjini, Velipoja, Vlora, Pogradeci, Dhërmi dhe shumë qytete e vende tjera bregdetare, janë të mbushura me turistë nga vendet e ndryshme të rajonit dhe Evropës, duke e shijuar njelmësinë e detit shqiptarë dhe rërën e mrekullueshme të këtij vendi. Shqipëria si një vend turistik , përveç bregdetit të Adriatikut dhe Detit Jon, turistët dhe pushuesit kanë mundësi ti vizitojnë edhe vendet tjera, me rëndësi kulturore dhe historike, ku vizitori mahnitet me traditat dhe kulturat e vjetra shqiptare. Atraksioni tjetër turistik është edhe Shkodra, ku aty gjendet kalaja e Rozafës, e cila ngrihet mbi një kodër shkëmbore, e rrethuar me ujërat e tre lumenjve, Drinit, Bunës dhe Kirit. Më rëndësi historike është edhe Kalaja e Krujës, e cila u ndërtua gjatë shekullit 5-të, dhe 6-të, ku aty ndodhet muzeu etnografik i Gjergj Kastriotit-Skënderbe, që i dedikohet luftërave të tij 25-vjeçare, kundër pushtuesit osman.

Nuk duhet harruar edhe bregdetin shqiptarë të Ulqinit, në Mal të Errtë, ku klima e këtij vendi është shumë e shëndetshme, sidomos pranë pishave, të cilat krijojnë klimë shumë të përshtatshme për organizëm, sidomos në orët e hershme të mëngjesit dhe në orët e vona të mbrëmjes.

Shumica e mërgimtarëve kanë një mallëngjim të veçantë për vendlindjen dhe atdheun e tyre, dhe kjo nostalgji është ndjenjë e natyrshme e njeriut kur jeton larg vendlindjes, apo atdheut , që te disa njerëz është më e ndjeshme dhe më e fuqishme, nga se, kur kthehen përsëri në mërgim, nuk e kanë lehtë nga malli që i kaplon për të afërmit dhe vendin e vet.

Sot në Kosovë dhe në gjitha viset shqiptare merr frymë lirisht, dhe nuk e ke ndjenjën e frikës, sikur më parë, sepse mërgimtarët shqiptarë keqtrajtoheshin dhe fyheshin sa herë që ktheheshin nga mërgimi, disa edhe nuk mund të ktheheshin fare, sepse ishin të ndjekur nga pushtuesi shekullor serb.