Rita Ora, sërish magjepsi Cyrihun

© albinfo.ch  Rita Ora duke dhënë autografe

Super ylli i muzikës botërore, këngëtarja me rrënjë shqiptare nga Kosova, Rita Ora, ka ndezur mbrëmë adhuruesit e saj në Plaza të Cyrihut, në eventin Energy Live Session të radio Energy.

Për ndryshim nga paraqitjet e saj në Cyrih gjatë muajit maj, kur ajo kishte qenë pjesë e koncertit të madh në stadium, të grupit Coldplay dhe në Rinora 4, kësaj radhe atmosfera ka qenë më intime.

Të gjithë 600 fatlumët që e kanë shikuar Rita Orën, këtë kanë mundur ta bëjnë si fitues të një loje shpërblyese që e ka organizuar radio energy e Cyrihut. Që d.m.th. nuk ka pasur fare bileta në shitje.

“Rita Ora është definitivisht një emër që duhet vënë re. 21 vjeçarja ka treguar sot në Plaza të Cyrihut para rreth 600 vetave se çfarë ka brenda. Dhe ajo ka shumë për të treguar! E vogël por me shumë vlera.

Me zërin e saj fantastik dhe me pamjen tërheqëse, ajo, që nga fillimi i karrierës ka paasur publikun në anën e saj”, shkruan portali i radios energy, duke bërë prezantimin e Rita Orës.

Më tutje: “Këngë përplot energji, që të shtyjnë të vallëzosh dhe falë rrezatimit të saj, të ngjisin edhe një buzëqeshje në buzë, ja, kjo është Rita Ora”.

Meqë albumi “Ora” del në dritë vetëm në vjeshtën që vjen, koncerti i saj i mbrëmshëm ka pasur gjithsej gjashtë këngë. Por sidoqoftë, një provë paraprake për albumin e saj patën mundësi ta shijojë publiku në Energy Live Session.

Pas 30 minutash të shout, Rita Ora ishte e gatshme që fansat e vet t`i përshëndesë dhe që t`ua ndajë personalisht autografet.