Blatter: "Kemi vendosur që Kosova mund të zhvillojë ndeshje miqësore"

Në një konferencë për medie që në këto çaste po mbahet në selinë e FIFA-s në Cyrih, kryetari i saj, Sepp Blatter, veç tjerash posa deklaroi: “Ne veç tjerash kemi marrë vendim edhe për Kosovën. Përfaqësuesja e Kosovës tash është e lejuar të luajë ndeshje testuese, miqësore kundër anëtarëve të FIFA-s”.

Në këtë konferencë që ka ngjallur interesim të madh në gjithë opinionin sportiv e më gjerë, çështje kryesore ka qenë dënimi i rasteve të korrupsionit për të cilat përflitet prej kohësh, ku janë të përfshirë krerët aktualë dhe të vjetër të FIFA-s.

Në këtë konferencë, i pari i FIFA-s ka kumtuar edhe ngritjen e një komisioni të etikës dhe të dy juristëve që do të hulumtojnë dhe luftojnë dukurinë e korrupsionit në këtë organizatë.

Blatter ka kundërshtuar të gjitha kërkesat edhe përfoljet për një dorëheqje të tij të mundshme. Ai, të gjitha këto i ka komentuar me fjalët: "Ju sot po e shikoni një president të lumtur të FIFA-s".

Konferencën e FIFA-s janë duke e transmetuar dretpërdrejtë disa portale informative zvicerane.