Hitzfeld: Shaqiri dhe Xhaka, më meritorët për sukseset e Zvicrës

Në një intervistë dhënë gazetës 20 minuten, kryetrajneri i kombëtares së Zvicrës, Othmar Hitzfeld e thotë edhe një herë shkoqur se dy lojtarët më të merituar për sukseset aktuale të skuadrës së tij janë Xherdan Shaqiri dhe Granit Xhaka.

“Kush luan për Bajernin duhet të ketë patjetër njëfarë klasi. Ne si ekip mund vetëm të përfitojmë nga kjo. Shaqiri është një lojtar që mund ta bëjë ndryshimin në një lojë”, ka thënë Hitzfeld, duke folur për "xhuxhin magjik".

Ndërsa kur u referohet dy shqiptarëve të rinj të kombëtares së Zvicrës, Shaqirin dhe Xhakën, ai shprehet: “Gëzohem për faktin se ata të dy kanë qenë më meritorët për ngritjen e kombëtares. Por ata janë ende të rinj dhe duhet të drejtohen.

Për moshën që kanë, ata janë jashtëzakonisht të pjekur. Mirëpo tash vjen një fazë e re. Ata sot janë superyje ose prezantohen nga mediet si të tillë. Ata duhet ta përballojnë këtë sfidë. Do të jetë interesante të shihet se si do të zhvillohen ata më tutje si personalitete”, ka shtuar Hitzfeld.