Sport

FIFA shqyrton lejimin e futbollistëve për të ndërruar kombëtare

Sipas rregullave aktuale, një futbollist nuk ka të drejtë të ndryshojë kombëtaren dhe të luajë për një tjetër nëse ka marrë pjesë në një garë zyrtare me një kombëtare. Rast i tillë është edhe Kosova

FIFA raportohet se është duke konsideruar ndryshimin e rregullave ndërkombëtare për ndryshim të kombëtareve të futbollit.

Sipas rregullave aktuale, një futbollist nuk ka të drejtë të ndryshojë kombëtaren dhe të luajë për një tjetër nëse ka marrë pjesë në një garë zyrtare me një kombëtare. Rast i tillë është edhe Kosova.

Kapiteni kosovar Samir Ujkani ka luajtur për Shqipërinë, por mori leje nga FIFA që të luajë për Kosovën dhe atij iu lejua pasi ai nuk ishte paraqitur në Botëror apo Evropian me kuqezinjtë. Megjithatë, një gjë e tillë nuk mund t’i lejohej edhe futbollistëve kosovarë të Zvicrës apo kombëtareve tjera që janë paraqitur në kampionate të rëndësishme.

Reuters raporton se FIFA është duke konsideruar ndryshimin e rregullave, duke i mundësuar një futbollisti të ndryshojë skuadër nëse ai ka luajtur vetëm një apo dy herë për një kombëtare dhe nuk ka më shans që të ftohet sërish.

“Ka shumë çështje që kanë dalë gjatë vjetëve të fundit sepse bota po ndryshon, imigrimi po ndryshon”, ka thënë presidenti i CONCACAF-it, Victor Montagliani, shkruan Albinfo. “Ka çështje kombëtare që kanë dalë në botë, në Afrikë, ka raste edhe në Azi dhe CONCACAF, andaj është mirë të shikohen dhe të bëhen zgjidhje, pa e lënduar integritetin e lojës”.