Lajme

Gruevski, vështirë që do ta bëjë qeverinë e re

Analisti Gjuner Ismail pret që Nikolla Gruevski të taktizojë deri në momentin e fundit, por në fund do të dështojë ta formojë qeverinë

Mandatari për formimin e qeverisë së re maqedonase, lideri i VMRO DPMNE-së, Nikolla Gruevski do ta ketë shumë të vështirë formimin e qeverisë së re. Madje analistët politikë në Shkup, besojnë se Gruevski përkundër taktizimeve, nuk do të arrij ta bëj koalicionin qeverisës.

Analisti Gjuner Ismail pret që Gruevski të taktizojë deri në momentin e fundit, por në fund do të dështojë ta formojë qeverinë. “Ai do të simulojë se po bën qeveri dhe në ditën e 20 mund të presim kurdisje e me të cilat do të blejë kohë. Mekanizmat e tij janë të njohura, është kryetari i kuvendit, me presidentin e famshëm të shtetit “, tha Ismail.

Ai gjithashtu vlerëson se parimi që vlente deri më tani që qeveria të formohet nga partitë e bllokut maqedonas dhe atij shqiptar që do të fitojnë më shumë mandate, e që konsiderohet si precedent nuk do të vlejë për këto zgjedhje.

Ismail hedh poshtë edhe mundësinë për një koalicion të gjerë.

“Qeveria e ardhshme nuk mund ta mbajë VMRO-DPMNE-në e cila në të gjitha analizat normale figuron si shoqatë kriminele. Sipas kësaj, ky vend nëse duron absurditet, një prej tyre, që mezi do të mund ta mbajë është që BDI të jetë pjesë e kësaj qeverie të ardhshme, por duke deleguar figura të cilët kanë arritur të mos i njollosin duart nga shoqërimi tetë vjeçar me Gruevskin”, konsideroi Ismail.

Në intervistën e fundit, Nikolla Gruevski theksoi se nuk do të formojë qeveri me çdo kusht dhe nëse BDI heq dorë nga parimi i fituesit me fituesin, atëherë VMRO DPMNE do të kthehej nga dera e madhe duke aluduar në fitoren që partia e tij do të korrte në zgjedhje të reja, citon INA.

“Në rast të tillë, sipas tij, partia askujt nuk do t’i ketë borxh asgjë. Por, vet VMRO DPMNE-ja në vitin 1992 nuk e pranoi mandatin për formimin e qeverisë pasi nuk deshi koalicionin me PPD-në, mandati atëherë iu dha Petar Goshevit, por as ai nuk arriti të sigurojë shumicë dhe e ktheu mandatin”, tha ai.

Ndërkohë në vitin 1998, siç kujton IsmaI, VMRO DPMNE-ja nuk respektoi parimin fituesi me fituesin duke e marr në qeveri PDSH-në ashtu sikurse edhe në vitin 2006 pavarësisht se kishte më pak mandate deputetësh.

Gruevski ka afat deri më 29 janar të formojë qeveri apo ta kthejë mandatin.

KUJDES ! TEKSTI YNË I KOPJUAR DO TË DENONCOHET DHE RAPORTOHET. PËRPOS NËSE...

Ju keni të drejtë ta riprodhoni tekstin tonë, por me kusht që ta citoni burimin e albinfo.ch dhe kur ta publikoni shkrimin, ta integroni linkun e artikullit siç vijon: http://www.albinfo.ch/gruevski-veshtire-qe-do-ta-beje-qeverine-e-re/

Në të kundërtën, ne do të raportojmë pranë Facebook për shkelje të të drejtës autoriale, gjë që sanksionohet nga Facebook dhe mund të ketë pasoja të rënda për faqen tuaj Facebook. Ju faleminderit për vëmendjen si dhe bashkëpunimin. Redaksia e albinfo.ch.