Sport

Heynckes: Shaqiri po bëhet një lojtar kulminant

Heynckes: "Shaqiri ka një potencial të madh për të ecur përpara. Kur ai hyn në fushë, prania e tij vërehet menjëherë. Unë besoj se ai do të jetë një futbollist kulminant absolut”.

Ashtu siç edhe pritej, FC Bayern ka mundur mbrëmë në ndeshjen testuese kampionin zviceran FC Baselin. 3 me 0 ka fituar “FCB i madh” ndaj “FCB-së së vogël” në stadiumin e mbushur përplot St.Jakob-Park të Bazelit.

Ndeshja ka qenë testuese por, sipas të dy klubeve, mjaft e rëndësishme. Ndërsa një rëndësi të veçantë ka pasur loja në Bazel për Xherdan Shaqirin, i cili po luante për herë të parë kundër klubit të tij të deri para disa muajve, FC Baselit dhe pikërisht në stadiumin e këtij të fundit, ku ai ka “mbretëruar” 2-3 viteve të kaluara.

Se një ritakim i tillë me ambientin ku është rritur si lojtar i këtyre përmasave ka peshën e vet emocionale ka treguar edhe kjo: Shaqiri për pak ka gabuar hyrjen e garderobës! Siç ka pranuar për mediet zvicerane menjëherë pas ndeshjes, ku ai është inkuadruar nga minuta 70, lojtari “i vogël-i madh” instinktivisht është drejtuar nga zhveshtorja e vendësve, pra e lojtarëve të FC Baselit, ku është mësuar të shkojë pas përfundimit të ndeshjeve nën fanellën e Bazelit.

Sidoqoftë, hyrja e tij në fushë është shoqëruar me përshëndetje dhe ovacione të mëdha nga publiku i emocionuar.

Sikurse edhe në ndeshjet kampionale me FC Bayernin, Shaqiri as kësaj here nuk është inkuadruar nga fillimi. Trajneri Heynckes e ka futur atë në lojë në minutën e 70 në vend të Müllerit.

Të tre golat për Bajernin janë shënuar mjaft herët. Mandzukic, Schweinsteiger dhe Ribery kishin “mbaruar punë” në minutat 11 dhe 37. Ndërsa Shaqiri ka pasur një shans të mirë për të shënuar, në minutën 78, por pa sukses.

Trajneri i Bayernit, Jup Heynckes, duke folur për emdiet zvicerane është shprehur mëse i kënaqur me lojtarin e tij më të ri. „Shaqiri është një `blerje`shumë e mirë. Më pëlqejnë lojtarët e këtillë, sepse ai ka një potencial të madh për të ecur përpara. Kur ai hyn në fushë, prania e tij vërehte menjëherë. Unë besoj se ai do të jetë një futbollist kulminant absolut”.