Ariu, preokupim edhe për qeverinë

Një ari që po qarkullon në malet e kantonit Graubünden është bërë ndër temat më preokupuese të shtypit të këtushëm javëve të fundit. Ariu që tashmë ka emrin (M13) dhe lëvizjet e tij ndiqen edhe me kamerë, po shihet tash së fundi edhe si kërcënim për jetën e njerëzve në regjionin e luginës Puschlav. 

Pak ditë më parë ai kishte „vizituar“ një shkollë fshati dhe me atë rast kishte shkatërruar dy koshere bletësh që ndodheshin në oborr të shkollës, duke e grabitur mjaltin nga aty.

Lëvizjet e ariut në afërsi të zonave të banuara me njerëz kanë shtyrë autoritetet lokale të kërkojnë takim me krerët e qeverisë së kantonit. 

Të shtunën qeveritarë të Graubündenit janë takuar me autoritetet e luginës. 

„Duam t`ua bëjmë me dije qytetarëve se sa me seriozitet i marrim brengat e tyre”, ka thënë ministri Mario Cavigelli. Ai ka thënë se javëve të fundit janë shtuar shqetësimet në luginë, prandaj ai po përpiqet të qetësojë gjendjen. 

„Situata në Puschlav tashmë po na shkakton shqetësim të madh. Ariu, thjesht, nuk po largohet më nga regjionet e banuara. Puna më e rëndësishme është, ka thënë ai, që lëvizjet e ariut të ndiqen me saktësi. Cavigelli e ka lënë të hapur nëse së shpejti do të lejohet gjuajtja me armë e ariut apo jo.