Asnjë vend për strehimin e azilkërkuesve

Në kantonin Vaud janë plotësuar të gjitha kapacitetet për strehimin e azilkërkuesve kështu që aty nuk ka mbetur praktikisht asnjë vend i lirë. Për këtë arsye, autoritetet e azilit në këtë kanton janë detyruar që për 23 azilkërkues të porsaardhur të gjejnë një zgjidhje alternative për strehim. Fjala është për pesë familje shumanëtarëshe, të cilat përkohësisht janë strehuar në lokalet e mbrojtjes civile (bunker) në Gollion të këtij kantoni.

“Ka qenë thjesht e pamundur që kaq shumë të ardhur brenda një dite të strehoheshin në shtëpitë ekzistuese të strehimit të azilkërkuesve”, janë arsyetuar autoritetet.

Kuota e plotësimit të vendeve në qendrat e azilit në këtë kanton tashmë është rreth 120 për qind , me gjithë faktin se kohëve të fundit qe shtuar numri i vendeve, me ç`rast kuzhinat, zyrat dhe bodrumet qenë shndërruar në dhoma fjetjeje.