Bekim B. ka shtënë me pushkë të ushtrisë zvicerane

Bekim B., njëri nga dy të arrestuarit për vrasjen e dyfishtë që ka ndodhur të enjten në Oensingen, ka shtënë me pushkën automatike të cilën e mbante që nga koha e shërbimit ushtarak. Ai, ashtu sikurse edhe shumë shërbyes ushtarakë të Zvicrës, është dashur ta kthente armën.

Bekimi kishte marrë shtetësinë e Zvicrës para disa vitesh ndërsa pas përfundimit të shërbimit ushtarak nën armë, që nga fillimi i vitit 2012 ai kishte kaluar në shërbimin civil, shkruajnë mediet zvicerane.

Me pushkën e ushtrisë dhe me një revole tjetër, Bekimi me babanë e tij ia kishin mësyrë shtëpisë së familjes së dhëndrrit, Përparimit, në Oensingen. Ai fillimisht i kishte telefonuar Përparimit duke e kërcënuar se nuk do të jetonte edhe gjatë.

Këtë kërcënim pastaj e kishte realizuar kur Përparimi me babanë, Hysenin kishin dalë për të sqaruar problemin që kishte Bekimi me ta. Ata dëshironin të merrnin gruan e Përparimit, Shqipen, për ta kthyer në shtëpi.

Pos Hysenit që ishte qëlluar në zemër dhe Përparimit, po ashtu të vrarë mizorisht, plagë të rënda ka marrë edhe një i afërm i tyre që kishte provuar të ndihmonte dy të sulmuarit.

Dy të dyshuarit janë arrestuar pa bërë rezistencë, pasi që njëri prej tyre i ishte paraqitur vetë policisë me telefon.

Arma ushtarake e gjetur te Bekimi kishte pasur afatin e fundit të dorëzohej në kazermë më 24 maj. Pastaj atij i ishte zgjatur afati, që kishte mbaruar më 13 qershor. Javën tjetër ajo do t`i merrej me detyrim, njoftojnë në ushtri. Por pushka automatike kishte vazhduar të mbetej në shtëpinë e tij.

Deri më 5 korrik, kur ndodhi ngjarja e kobshme.

Një revole që është gjetur gjatë kontrollit në shtëpinë e tyre, familja B e mbante pa leje