E djegin të gjallë vrasësin e dy fëmijëve

Një turmë banorësh të një fshati të Guatemalës, të zemëruar në kulm me një vrasës të dy fëmijëve ka marrë ligjin në duart e veta dhe e ka mbytur atë në mënyrën më barbare. Pas rrahjes nga turma, personin e sulmuar e kanë lyer me benzinë dhe e kanë djegur të gjallë. 

Ky duket të mos jetë rasti i parë që në Guatemalë linçohen njerëzit. Besimi në drejtësinë e shtetit është veçanërisht i ulët në fshatrat indigjene të këtij vendi. Julio Saquil, 35 vjeçar, i dehur kishte hyrë në mësonjëtoren e një shkolle të fshatit që është 190 km nga kryeqyteti. Me një shpatë ai u kishte vrarë në mënyrën më mizore dy fëmijë, duke u hequr kokën vajzës 8 vjeçe Evelyn Yanisa Saquij Bin dhe djalit 13 vjeç Juan Armando Coy Cal.

Pas kësaj një turmë e zemëruar e kishte zënë vrasësin dhe kishte filluar ta godiste me gurë dhe me shkopinj. Pastaj, mësuesit e tërbuar i hodhën benzinë dhe ia vunë zjarrin. Kur erdhën zjarrfikësit, Saquil ishte tashmë i vdekur.

Ky është rasti i 234-t i linçimit që është shënuar në Guatemala vetëm gjatë vitit të fundit. Siç bëjnë të ditur organizatat për mbrojtjen e të drejtave të njeriut, gjatë këtyre linçimeve kanë gjetur vdekjen 40 persona.