E verdha e vesë, e dëmshme sikur duhani

I pasur në Omega-3, me vitamina dhe antioksidues, e verdha e vesë do t’i kishte të gjitha cilësitë e një ushqimi komplet, sikurse të mos kishte përmbajtje të lartë të kolesterolit. Hulumtime të ndryshme të viteve të fundit kanë pasur për tendencë që ta relativizojnë impaktin e kolesterolit të sjellë nëpërmes ushqimit mbi përqindjen e tij të gjetur në gjak (mëlqia e prodhon pjesën më të madhe).

Mirëpo, siç duket, debati nuk ka përfunduar pasi që një studim kanadez e ka rilansuar një argument shokues: e verdha e vesë është praktikisht po aq e keqe ndaj arterieve sikurse duhani.

Shkencëtarët e kanë vërejtur se krijimi i plaketave të yndyrës, të cilat i mbyllin enët e gjakut dhe të cilat shkaktojnë infarktus të miokardit ose ndonjë aksident vaskular në tru, ka tendencë të shpejtësohet që nga mosha 40-vjeçare te personat të cilët konsumojnë rregulisht të verdhën e vesë, respektivisht tek ata që konsumojnë më shumë se tri herë në javë.

Është fakt se faktorë të tjerë kanë mundur të intervenojnë, sikurse shkalla e aktivitetit fizik e pjesëmarrësve, i cili nuk ka qenë i matur gjatë studimit. Mirëpo për Dr Spence, specialist i parandalimit të aksidenteve kardio-vaskulare, disa persona që janë të prekur nga kolesteroli duhet të kenë kujdes në konsumimin e të verdhës së vesë.

Në Francë rekomandohet ndaj pacientëve me shëndet të rrezikuar të arterieve që të mos i tejkalojnë 2-3 ve në javë dhe ta kufizojnë konsumimin ditor të kolesterolit në 300 miligramë (mg). Nëse një e verdhë e vesë përmban 200 mg kolesterol, duhet pasur kujdes nga produkte ushqimore të tjera, sikurse ëmbëlsirat. Prandaj, gjithmonë duhet lexuar etiketat e produkteve me vëmendje.