Lihtenshtajni propozon memorandum mirëkuptimi me Kosovën

Lihtenshtajni dhe Kosova janë marrë vesh për një bashkëpunim më të ngushtë në mes të dy vendeve në të ardhmen. Kështu ka dalë nga takimi që kanë pasur paraditën e sotme përfaqësuesit e autoriteteve të dy shteteve në nivel ekspertësh për partneritetin në sferën e migracionit mes Zvicrës, Lihtenshtajnit dhe Kosovës.

Principata e Lihtenshtajnit ka të nënshkruar që në vitin 2007 një memorandum mirëkuptimi. Nënshkrimi një memorandumi të tillë edhe me Kosovën ka qenë subjekt i takimit të sotëm të delegacionit kosovar të drejtuar nga Shkodran Manaj, përgjegjës i departamentit për shtetësi, azil dhe migracion.

Manaj ka shprehur kënaqësinë me propozimin e bërë nga Lihtenshtajni. Me këtë rast të dy palët janë marrë vesh për një takim bilateral në nivel ministrash për të bërë hapin e radhës në drejtim të nënshkrimit të një memorandumi të tillë, bën të ditur agjencia NA-portal e Lihtenshtajnit.

Temat tjera që janë rrahur në takimin e ekspertëve në Vaduz kanë qenë heqja e detyrimit të vizave për qytetarët e Kosovës për vizitat e tyre në BE, Zvicër e Lihtenshtajn.

Po kështu luftimi i migracionit ilegal dhe planifikimi e koordinimi i projekteve ndërkombëtare për ndihmë refugjatëve dhe migrantëve, që mbështeten financiarisht nga Lihtenshtajni dhe Zvicra.