Miratohet marrëveshja për “zhurmën e aeroplanëve”

Këshilli Federal ka aprovuar marrëveshjen me Gjermaninë për "zhurmën e aeroplanëve" që nënkupton problemin e krijuar në Zvicrën lindore dhe në Gjermaninë jugperëndimore nga zhurma që lirojnë aeroplanët gjatë ngritjes dhe aterrimit në Aeroportin e Cyrihut në Kloten.

Ministrja e Transportit, Doris Leuthard tashmë e ka nënshkruar marrëveshjen, njofton Këshilli Federal.

Në fillim të korrikut, përfaqësuesit e Zvicrës dhe Gjermanisë kanë arritur pajtimin për të rregulluar fluturime për dhe nga Aeroporti i Cyrihut. Kompromisi, siç thuhet, parasheh që të gjithë aeroplanët duke filluar nga ora 18 deri në orën 6.30 të mund të aterrojnë duke shfrytëzuar vetëm territorin e Zvicrës.

Nga ana tjetër, Gjermania heq dorë nga kufizimi i numrit të fluturimeve. Kështu në mëngjes, aeroplanët e aeroportit të Cyrihut mund të fluturojnë mbi territorin gjerman një gjysmë ore më herët. Krahas kësaj Aeroporti i Cyrihut detyrohet të zgjasë pistat. Po kështu, për këtë kompromis, siç thuhet në njoftim, duhet të votojnë edhe parlamentet e të dy vendeve.