Në Bazel, synetia vazhdon si më parë

Spitali Universitar i fëmijëve i Bazelit dhe Bazelandit UKBB do të vazhdojë edhe më tutje të kryejë ndërhyrjet kirurgjike të synetisë, me bazë fetare. Spitali në fjalë mund ta ndryshojë këtë praktikë vetëm në rast se drejtësia zvicerane do te ndalojë atë, thuhet në një komunikatë për shtyp të UKBB.

Drejtori i këtij spitali, Conrad E. Müller thotë se synetia e fëmijëve meshkuj, në Zvicër praktikohet prej disa dekadash, në bazë të dëshirës së prindërve, shkruan news.search.ch.

Ditë më parë, Spitali i fëmijëve në kuadrin e Qendrës spitalore universitare të Cyrihut kishte vendosur që përkohësisht të ndalonte operacionin e synetisë. Hapin e Cyrihut e kishte ndjekur pastaj edhe St. Galleni.

E gjithë kjo valë ndalimesh dhe debati rreth synetit si ritual fetar hebraik dhe islamik kishte nisur si jehonë e një vendimi që Gjykata e Landit e Këlnit, Gjermani, e kishte marrë muajin e kaluar. Vendimi në fjalë e konsideronte synetin si shkaktim lëndimi trupor ndaj fëmijëve dhe për këtë arsye e shpallte të dënueshme një ndërhyrje të tillë kirurgjike.

Mjekët e Cyrihut dhe ata të St. Gallenit, ndërprerjen e operacioneve të synetisë e kishin arsyetuar me frikën se po kryenin vepër të dënueshme, edhe pse gjykata e Këlnit nuk ka kompetenca në Zvicër.