"Nuk e kam vrarë Viganin" thotë Shiwan Muhamed

I akuzuari për vrasjen e Vigan Morinës 23 vjeçar, kurdi nga Iraku, me qëndrim në Zvicër, Shiwan Muhamed nuk pranon se vrasja është vepër e tij. Kështu i ka thënë shtypit zviceran avokati i tij duke cituar Shiwanin. Ky i fundit ka rreth një javë që është arrestuar në një qytet të Norvegjisë së jugut dhe po mbahet në paraburgim.

Menjëherë pasi kishte ndodhur vrasja pranë një lokali të njohur të Cyrihut, më 15 korrik, i dyshuari për vrasjen kishte ikur në Norvegji. Pyetjes së gazetarëve se përse ai ka ikur nëse nuk është fajtor për vrasjen, avokati nuk i ësh¨të përgjigjur.

Sidoqoftë, ka thënë avokati, pritet që klienti i tij të ekstradohet në Zvicër. Por, sipas tij, pengesa e vetme për këtë është se Zvicra ende nuk ka bërë kërkesë për ekstradim!Shiwan po mbahet në një qeli izolimi. Atë nuk mund ta vizitojë askush dhe as t`i telefonojë.

Vrasja e Viganit dhe plagosja e rëndë e vëllait të tij, Visarit pati ngjallur një pikëllim dhe revoltë në mesin e miqve dhe qytetarëve tjerë të Zvicrës. Një javë pas tragjedisë, në qytetin e Cyrihut qe zhvilluar me këtë pretekst një marsh protestues kundër dhunës.