Shtyrja e pensionimit, në trend

Gjithnjë më shumë zviceranë vazhdojnë të punojnë edhe përtej moshës së paraparë për të dalë në pension, që është e rregulluar me ligj. Paralelisht me këtë dukuri, në Zvicër viteve të fundit  po shkon drejt rënies trendi i mëparshëm për pensionim të parakohshëm.

Në këtë përfundim ka ardhur një studim i realizuar me kërkesë të Entit Federal për Sigurime Sociale (BSV).

Sipas këtij studimi, rreth një e treta e meshkujve dhe e femrave  gjatë tri viteve të fundit kanë punuar përtej moshës së caktuar për pensionim. Ndërsa marrë mesatarisht, meshkujt në Zvicër pensionohen në moshën 64.1 vjeçare dhe femrat në moshën 62.6 vjeçare.

Në konkurrencë ndërkombëtare, Zvicra në këtë aspekt mban njërin ndër vendet e para, bashkë me Norvegjinë dhe Suedinë.

Shtyrja e moshës për pensionim është një fenomen që gëzon autoritetet përkatëse në Zvicër. Kjo për faktin se vazhdimi i punës nga ana e personave të moshuar ka rëndësi të madhe për tejkalimin e sfidave demografike, gjegjësisht plakjes së shoqërisë.

Nxitja për punë e  punëtorëve në moshë të shtyrë mund të kompensojë mungesën e pritshme të fuqisë punëtore në Zvicër. Ndërsa puna e tyre do të kontribuojë për financimin afatgjatë të sigurimit të pleqërisë.