Zuppiger, në janar para gjyqit

Deputeti nacional i dorëhequr dhe ish kandidati për ministër në Qeverinë e Zvicrës do të ulet në bankën e zezë më 16 janar të vitit 2013. Siç  ka kumtuar Prokuroria e Qarkut be Cyrihut, Zuppiger do të përgjigjet për përvetësim të padrejtë.

Ish deputeti bashkë me një ish punëtor të firmës së tij këshillëdhënëse Zuppiger&Partner AG, sipas padisë kanë përvetësuar një pasuri të trashëguar prej 240 mijë frangash që duhej ta trashëgonte  një punëtore e firmës. Prokuroria kërkon për të dy të akuzuarit dënim me nga 13 muaj burg me kusht.

Në dhjetor të vitit 2011 gazeta javore “Weltwoche” pati publikuar njoftimin mbi parregullsitë e ndodhura në firmën e Zuppiger-it, që pati pasoja shkatërruese për karrierën politike të këtij të fundit. 

Menjëherë pas publikimit të këtij skandali, ai u detyrua të tërhiqte kandidaturën për këshilltar federal (ministër). Më vonë Zuppiger ka hequr dorë edhe nga posti i kryetarit të Federatës së Tregtarëve të Zvicrës.

Ndërsa më 10 shtator të këtij viti, ai dha dorëheqje të menjëhershme nga detyra e deputetit nacional, që e kishte ushtruar prej 13 vitesh.