2500 € të kthimit vullnetar joshin azilkërkuesit e Ballkanit

Ndihma financiare, të cilën e ofrojnë vendet e BE-së, si Gjermania, për azilkërkuesit dhe e cila për një familje me katër fëmijë është më shumë se 2.500 euro, është arsyeja e rritjes së numrit të kërkesave për azil nga qytetarët e Maqedonisë dhe të Serbisë, shkruan gazeta gjermane "Focus".Më se pesëdhjetë për qind është rritur numri i shtetasve të Maqedonisë, të cilët në tetë muajt e parë të këtij viti kanë bërë përpjekje për të kërkuar azil në vendet e Bashkimin Evropian, thonë statistikat në "Eurostat".Dy vjet pas heqjes së regjimit të vizave për qytetarët e Serbisë, Maqedonisë dhe Malit të Zi, në dhjetor të vitit 2009, mijëra njerëz, shumica nga Serbia, kërkuan azil në BE, kryesisht në Suedi, Belgjikë dhe Gjermani.Kur flasim për qytetarët e Maqedonisë, nga janari deri në gusht janë regjistruar 440 persona që kanë kërkuar azil për shkaqe të ndryshme, por numri u rrit në 1085. Rritja më e madhe në numër është parë në Gjermani. Nga 235 persona, numri u rrit deri në 1015. Analiza tregon se vendi më atraktiv pas Gjermanisë për të kërkuar azil nga qytetarët e Maqedonisë është Franca. Në këtë vend në muajin janar janë regjistruar saktësisht 35 azilkërkues, në gusht numri i tyre u rrit në 140 persona. Në listën e vendeve tërheqëse për kërkuesit e azilit është edhe Suedia, ku aktualisht ka 60 azilkërkues. Shembull pozitiv në reduktimin e numrit të azilkërkuesve nga Maqedonia gjykuar në statistikat e "Eurostat”-it janë Luksemburgu dhe Belgjika, ku nga një total prej 135 azilkërkuesve, kanë mbetur vetëm pesëdhjetë.Për shkak të fluksit të madh të azilkërkuesve në shtetet anëtare të BE-së, Brukseli ka paralajmëruar Beogradin, Podgoricën dhe Shkupin se e ardhmja e udhëtimit pa viza në zonën Shengen është vënë në pikëpyetje, edhe pse dihet se procedurat për ta bërë këtë marrin kohë dhe janë të komplikuara.Gazeta gjermane "Fokus" raporton se ndihma financiare prej 2500 eurosh motivon azilkërkuesit nga vendet e ndryshme që të kërkojnë azil në Gjermani dhe vende të tjera evropiane. Bëhet fjalë kryesisht për popullsi rome nga Maqedonia, Mal i Zi dhe Serbia.“Fokus” njoftoi se ka bërë të ditur që shumë azilkërkues duan azil në Gjermani vetëm pse për kthimin vullnetar kompenzohen për koston e rrugës, përfshirë edhe ndihmat financiare për një familje me katër fëmijë që është më shumë se 2.500 euro. Vitin e kaluar, sipas "Focus"-it nga Gjermania janë kthyer vullnetarisht 3107 të huaj, për të cilët shteti ka paguar rreth 3.8 milionë euro.