Dialogu, kusht për integrim në ambientin e punës

“Dialogu i integrimit dhe bota e punës” është titulluar aktiviteti shumëplanësh që është zhvilluar sot në Bernë, me nikoqir Konferencën trepalëshe të Aglomeracionit (TAK) që përfaqëson tre partnerët socialë: punëdhënësit, punëmarrësit dhe shtetin. E gjithë kjo veprimtari është përqendruar në problemet dhe të arriturat e integrimit të të huajve përmes ambientit të punës.

Përfaqësues të të gjitha niveleve të institucioneve shtetërore dhe të shumë segmenteve të shoqërisë  duke filluar nga Qeveria Federale, e përfaqësuar nga ministrja e drejtësisë Simonetta Sommaruga e më tutje, kanë marrë pjesë në takimin dialogues që ka promovuar nevojën për qasje më proaktive ndaj integrimit.

Pos ministres Sommaruga, nga institucionet federale ka marrë pjesë edhe drejtori i Zyrës federale për Migracion, Mario Gattiker, Blaise Roulet, zëvendësdrejtor i zyrës federale për Arsim Profesional dhe teknologji, etj.

Kryetari i qeverisë së qytetit-kanton Baseldtadt, Guy Morin dhe kryetar i TAK ka qenë këtu edhe në cilësinë e nikoqirit.

Ajo që ka dalë si konkluzë nga ky bashkëbisedim u është adresuar gazetarëve në një konferencë për shtyp.

Ministrja federale Simonetta Sommaruga, duke raportuar nga takimi i rëndësishëm ka thënë se ndër rezultatat e e kësaj mbledhjeje ka qenë pajtimi për të shtuar kërkesat në drejtim më të mirë të popullatës së huaj. “Integrimi është proces dypalësh, kështu që duhen sfiduar si të huajt ashtu edhe vendësit për të bërë punën e tyre. Mësimi i gjuhës është kushti kryesor të cilin duhen plotësuar të huajt në shoqërinë e re”, ka thënë veç tjerash Sommaruga.

Ndëresa Guy Morin, ka thënë se Zvicra nuk mund të funksionojë pa të huajt në shumë segmente të jetës.

Referuesit tjerë kanë trajtuar aspekte të ndryshme të jetës që lidhen me praninë e të huajve në Zvicër dhe me integrimin e tyre në këtë vend.