Për 48 plaçkitje, kosovari dënohet me 4.5 vjet burg

Gjykata Penale në Liestal (Baselland) ka dënuar një shtetas 33 vjeçar të Kosovës, me 4 vjet e gjysmë burg. Ky dënim ish kamerierit i është shqiptuar për 48 veprat penale, grabitje, të kryera në periudhën në mes të viteve 2008 e 2009 në regjionin e Baselandit.

“Repertori” i vjedhjeve të kryera nga 33 vjeçari ka qenë mjaft i gjerë. Nga arkat, revolet, çeqet, orët, kamerat telefonat mobilë, pasportat e deri te pullat postale. Vlera e gjithmbarshme e gjërave të vjedhura nga ai është rreth 250 mijë franga.

Disa nga vjedhjet e bëra i ka pranuar ndërsa disa të tjera i mvishen pasi që në vendet e kryerjes janë gjetur shenja të ADN-së ose shenjat e këpucëve.

Gjykata nuk ka mundur të konstatojë se ku ka qëndruar i dënuari gjatë viteve 2010-2011. Por dihet se dy fëmijët e tij, dy dhe tre vjeç jetojnë në Austri. Ndërksaq, pas kësaj pauze 2 vjeçare, kosovari ka dalë sërish në sipërfaqe, me ç`rast, pas një përpjekjeje të dështuar për vjedhje arestohet në Arbon të Thurgaut.

Krahas dënimit me 4.5 vjet burg, ai mbetet borxh edhe për 1 vjet tjetër, për shkakun se në vitin 2006, deri sa po vuante në Cyrih një dënim me 2.5 vjet kishte ikur nga burgu.

I dënuari kishte shkuar si 18 vjeçar në Gjermani, ku, në vitin 1997 i ishte njohur azili. Por nga ajo kohë ai, siç është thënë në vendimin gjyqësor, “profesion të tij e ka bërë krimin”.

Kritikat në opinion për dënimet e buta që po u shqiptohen “turistëve kriminelë” mund të çonin në ndonjë dënim më të rëndë.

Kryesuesi i trupit gjykues ka thënë se ka qenë e mundur të shqiptohej një dënim deri në 15 vjet burg. Por, është parë e arsyeshme që të jepej ky dënim, pra 4.5 vjet e gjysmë burg, aq sa ka kërkuar edhe prokuroria.