Futboll

Krenar që luan për Kosovën

Arbenit Xhemajli flet për ftesën nga Kosova, ndeshjen me Shqipërinë dhe sezonin e mirë me Xamaxin

Njëri nga futbollistët që është ftuar për herë të parë nga përzgjedhësi i Kosovës, Bernard Challandes është Arbenit Xhemajli, i cili luan në Xamax.

Ai po jeton ‘si në ëndërr’, pasi kishte një sezon të shkëlqyeshëm me Xamax, luajti për Kosovën U-21, dhe tani i ka ardhur ftesa nga Kosova U-21.

Xhemajli në një intervistë ekskluzive tregon për ftesën nga Kosova. “Kur më ka ardhur ftesa, isha shumë i lumtur, por edhe shumë krenar. Kisha shumë emocione. Kam luajtur për Kosovën U-21 në kualifikime dhe tani më ka ardhur ftesa nga Kosova A”, shprehet Xhemajli për albinfo.ch.

Për të ky ka qenë një sezon shumë i suksesshëm. “Ishte shumë mirë. Ky ishte viti i parë në Xamax. I kam zhvilluar disa ndeshje dhe në ato lojë e kam treguar veten. Luaj si qendërmbrojtës. Ato ndeshje besoj se kanë bindur edhe Kosovën për të më ftuar”, thekson 20-vjeçari, duke shtuar: “Me Xamaxin kemi arritur të ngjitemi në Superligë. Jemi të gatshëm si ekip për elitën e futbollit zviceran dhe unë personalisht jam i gatshëm”, nënvizon Arbeniti.

Ai flet edhe për ndeshjen miqësoren me Shqipërinë, që Kosova do ta zhvillojë të martën. “Është realizim i ëndrrës të luaj për Kosovën. Familja ime është e lumtur për zgjedhjen time. Besoj se do të jetë një ndeshje e mirë, me shumë shikues, që nuk do ta harroj kurrë”, deklaroi Arbenit Xhemajli për albinfo.ch.