Sport

Kryetari i UEFA-s: Jam i privilegjuar që po e vizitoj Kosovën

Presidenti i UEFA-s Aleksander Çeferin ka ofruar mbështetje për futbollin kosovar, transmeton albinfo.ch. Ai ka kërkuar më shumë punë nga institucionet kosovare për infrastrukturën sportive

Presidenti i UEFA-s, Aleksander Çeferin, i shoqëruar nga zyrtarët e UEFA-s Zoran Lakoviç, Luka Zajc dhe Zlatko Pavlica po qëndron për një vizitë zyrtare në Kosovë. Ata janë pritur nga kryeministri në detyrë Isa Mustafa, Ministrja e sportit, Vlora Dumoshi dhe kreu i FFK-së, Fadil Vokrri.

Presidenti i UEFA-s Aleksander Çeferin ka ofruar mbështetje për futbollin kosovar, transmeton albinfo.ch. Ai ka kërkuar më shumë punë nga institucionet kosovare për infrastrukturën sportive.

“Ndjehem shumë i privilegjuar që pata mundësi ta vizitoj Kosovën si federatë. Me këtë rast përgëzoj presidentin Vokrri për këtë angazhim dhe këtu po shoh një vullnet për zhvillimin e futbollit. UEFA do të jetë mbështetëse e fortë dhe ne jemi të vetëdijshëm se si Federatë e pranuar vonë, keni nevojë për shumë gjëra e ne do të jemi gati gjithmonë t’u dalim në ndihmë për të ecur para”, ka thënë presidenti i UEFA-s.

Ndërsa Vokrri ka falënderuar presidentin Çeferin për këtë vizitë që për futbollin e Kosovës është historike dhe shumë domethënëse. “FFK-ja po punon fort në përmirësimin e kushteve, përmirësimin e infrastrukturës si dhe në organizimin dhe ngritjen profesionale të zyrtarëve, gjyqtarëve e trajnerëve. Po ashtu po punojmë edhe në zhvillimin e futbollit të femrave dhe futsallit. Unë edhe njëherë ju falënderoj për gjithë mbështetjen që keni dhënë si president i UEFA-s por edhe sa ishit president i FF të Sllovenisë”, ka thënë Vokrri.

Delegacioni i UEFA-s vizitoi edhe  stadiumin e Prishtinës i cili po rinovohet për t’u përgatitur për  ndeshjet ndërkombëtare. Atij iu dhuruan fanella nga tifozët e përfaqësuese së Kosovës.