E-Diaspora

Lirohet kosovari që vrau polakun: Videot tregojnë se ishte në vetëmbrojtje

E veçantë për këtë proces gjyqësor ka qenë rrethana se kamera vëzhguese e ka filmuar të gjithë zhvillimin e ngjarjes në barin e Vjenës

Është liruar pasi është shpallur i pafajshëm për rastin e vrasjes me thikë të një polaku nga ana e një shqiptari të Kosovës, në Vjenë. Gjyqtarët porotë të Gjykatës së Landit në Vjenë i kanë falur besimin deklaratës së kosovarit se vrasjen e ka bërë në vetëmbrojtje.

Plot pesë orë u janë dashur gjyqtarëve porotë (laikë) që me 7 vota pro dhe 1 kundër të lirojnë kosovarin 34 vjeçar nga akuza për vrasje. Ndërsa 5 me 3 kanë qenë votat e tyre sa i përket cilësimit të këtij akti si vrasje në vetëmbrojtje, shkruan agjencia austriake e lajmeve APA.

Rasti tragjik ka ndodhur më 8 dhjetor të vitit të kaluar në një bar të lagjes Favoriten të Vjenës, transmeton albinfo.ch mediat austriake. Kosovari kishte vrarë moshatarin e tij polak dhe kishte plagosur rëndë  edhe një bashkatdhetar të polakut.

Duke qenë se prokurorja e rastit nuk ka dhënë asnjë deklaratë pas përfundimit të procesit, konsiderohet se vendimi i trupit gjykues ende nuk është i plotfuqishëm.

Sidoqoftë, i akuzuari është liruar aty për aty dhe i është dhënë mundësia që menjëherë të dalë nga ndërtesa e gjyqit si njeri i lirë.

E veçantë për këtë proces gjyqësor ka qenë rrethana se kamera vëzhguese e ka filmuar të gjithë zhvillimin e ngjarjes në barin e Vjenës. Dhe ky xhirim është emetuar edhe në sallën e gjyqit, përcjell albinfo.ch. Dy polakët kishin pirë shumë atë mbrëmje. 34 vjeçari tashmë i ndjerë ka pasur 2.5 promilë alkool në gjak ndërsa bashkatdhetari i tij 37 vjeçar madje, 4 promilë. Ata dy kishin treguar sjellje shumë agresive, siç është parë edhe në video. Aty dëgjohet po ashtu polaku duke i thënë kamerieres që u shërbente (e cila ishte në lidhje me kosovarin) se do ta vriste të dashurin e saj. Ajo ndërkaq ka bërë përpjekje për ta qetësuar.

Megjithatë, siç tregon videoxhirimi, kosovari e ka qëlluar me thikë pa qenë i sulmuar më parë. Pasi e ka goditur shtatë herë, ai ka vdekur në vendin e ngjarjes, transmeton albinfo.ch.. Pastaj ai ka goditur edhe polakun tjetërnë shpinë dhe në krahun e djathtë.

Para gjyqit ai ka deklaruar se i ka sulmuar ata nga frika që ka pasur prej tyre.

KUJDES ! TEKSTI YNË I KOPJUAR DO TË DENONCOHET DHE RAPORTOHET. PËRPOS NËSE...

Ju keni të drejtë ta riprodhoni tekstin tonë, por me kusht që ta citoni burimin e albinfo.ch dhe kur ta publikoni shkrimin, ta integroni linkun e artikullit siç vijon: http://www.albinfo.ch/lirohet-kosovari-qe-vrau-polakun-videot-tregojne-se-ishte-ne-vetembrojtje/

Në të kundërtën, ne do të raportojmë pranë Facebook për shkelje të të drejtës autoriale, gjë që sanksionohet nga Facebook dhe mund të ketë pasoja të rënda për faqen tuaj Facebook. Ju faleminderit për vëmendjen si dhe bashkëpunimin. Redaksia e albinfo.ch.