E-Diaspora

Masiela Lusha nuk e harron ndihmëtarin e saj: E viziton nga Hollivudi për ditëlindje

Sot Franz Ondraschek është shumë krenar me “të bijën” e tij. "Qysh në moshën 7 vjeçare ajo i zotëronte tri gjuhë. Pas kalimit në SHBA ajo pati mësuar edhe anglishten. Dhe përkundër suksesit të arritur, Masiela ka mbetur modeste..."

Franz Ondraschek, një politikan dhe humanist austriak ka festuar më 30 dhjetor ditëlindjen e 70-të. Në festën e tij jubilare ai ka pasur edhe një mysafire speciale: aktoren, producenten  dhe shkrimtaren shqiptare, të ardhur enkas nga Kalifornia e SHBA-së, Masiela Lusha, “bijën” e tij në shpirt, shkruan noen.at.

Miqësia me Masielën ka një histori interesante. Ajo me nënën e saj ishte arratisur në fund të viteve të tetëdhjeta nga Shqipëria, transmeton albinfo.ch. Përmes Hungarisë, ato kishin arritur në Austri, ku i kishte pranuar dhe strehuar pikërisht Ondraschek. Me mbështetjen e tij, ato ua kishin dalë pastaj që të kalonin oqeanin dhe të vendoseshin në SHBA, ku Masiela ka bërë një karrierë të madhe.

Si shkrimtare, ajo ka shkruar libra për fëmijë ndërsa si aktore ia ka dalë të bëjë karrierë edhe në studiot e filmit në Hollivud, përcjell albinfo.ch. Ajo ka luajtur në disa seri televizive madje dy herë është vlerësuar me çmimin “Young Artist Award” për rolin më të mirë të femrës në komedi dhe dramë.

Sot Franz Ondraschek është shumë krenar me “të bijën” e tij. “Masiela është një e re shumë ambicioze. Qysh në moshën 7 vjeçare ajo i zotëronte tri gjuhë. Pas kalimit në SHBA ajo pati mësuar edhe anglishten. Dhe përkundër suksesit të arritur, Masiela ka mbetur modeste dhe angazhohet për projekte sociale.