Lajme

“Më pak heronj të luftës, më shumë Vetëvendosje”

Müller thotë se është koha “e përzierjes ndryshe të kartave”. Deri më tash në Kosovë gjithçka i është nënshtruar diktatit të stabilitetit, ndërsa tash e tutje politika duhet të bëhet më e hapur: më pak dominim ndërkombëtar dhe heronj lufte, më shumë vetëvendosje dhe demokraci"

Titulli më lart nuk është i shkruar nga ithtarë të Vetëvendosjes dhe vetëm në mënyrë të tërthortë mund të thuhet se ka ndonjë lidhje me lëvizjen me këtë emër. Fjalët nga titulli janë të ekspertit zviceran të Ballkanit, gazetarit veteran Walter Müller, të shqiptuara në një intervistë dhënë radios së transmetuesit publik të Zvicrës SRF. Ai në këtë intervistë veç tjerash shpjegon se me gjithë faktin se kosovarët kanë zgjedhur me njëfarë shumice ish krerët e luftës, fama e tyre po shkon drejt zbehjes, transmeton albinfo.ch. Por, thekson ai, zgjedhja e tyre duhet kuptuar pasi që në Kosovë punëdhënësi më i madh është shteti, e shtetin, siç thuhet “e ka në dorë” PDK-ja e cila është në pozitë prej shumë vitesh.

Më tutje Müller thotë se fituesja e vërtetë i zgjedhjeve është lëvizja Vetëvendosje. Sipas tij, së paku në planin e brendshëm, asaj nuk i ka prishur punë fakti se ka hedhur gaz lotsjellës në parlament, një veprim që nuk ishte shikuar mirë jashtë vendit. “Kjo parti shprehimisht e majtë dhe e re është fituesja e vërtetë e zgjedhjeve. Albin Kurti, kreu i kësaj partie, e sheh veten si socialdemokrat, ai ndërkaq dëshiron të votohet nëse Kosova do t`i bashkohet vendit fqinj, Shqipërisë.

Ai po ashtu e sheh të vështirë që në krye të qeverisë së ardhshme të vihet Haradinaj, pasi që atë Serbia e konsideron si kriminel lufte, ndërsa partia serbe në parlament dirigjohet nga Beogradi kështu që është pak e besueshme se do ta votojë.

Dhe kur jemi te stabiliteti, Müller thotë se tash, me forcimin e Vetëvendosjes është koha “e përzierjes ndryshe të kartave”. Deri më tash në Kosovë gjithçka i është nësnhtruar diktatit të stabilitetit, ndërsa tash e tutje politika duket se do të bëhet më e hapur. Shteti i ri po vjen në një fazë të re të zhvillimit: më pak dominim ndërkombëtar dhe heronj lufte, më shumë vetëvendosje dhe demokraci, transmeton albinfo ch. Por bashkë me këtë, edhe më shumë risk, më shumë kundërthënie, më shumë konflikte. Dhe kjo, nuk është e thënë të jetë më keq. Bashkësia ndërkombëtare deri tash i ka dashur më shumë “burrat e fortë”, të cilët e zotërojnë shtetin e tyre dhe i shtyjnë çështjet përpara. Kështu, janë sakrifikuar procedurat demokratike për hir të stabilitetit, që ka qenë synimi më i lartë i BE-së dhe SHBA-së. Bashkësia ndërkombëtare duhet të mësohet me faktin se kjo fazë po shkon drejt përfundimit. Në anën tjetër, qeveritë e ardhshme në Kosovë duhet të dëshmojnë se për ta është më i rëndësishëm një shtet funksional se sa xhepat e tyre.

KUJDES ! TEKSTI YNË I KOPJUAR DO TË DENONCOHET DHE RAPORTOHET. PËRPOS NËSE...

Ju keni të drejtë ta riprodhoni tekstin tonë, por me kusht që ta citoni burimin e albinfo.ch dhe kur ta publikoni shkrimin, ta integroni linkun e artikullit siç vijon: http://www.albinfo.ch/me-pak-heronj-te-luftes-me-shume-vetevendosje/

Në të kundërtën, ne do të raportojmë pranë Facebook për shkelje të të drejtës autoriale, gjë që sanksionohet nga Facebook dhe mund të ketë pasoja të rënda për faqen tuaj Facebook. Ju faleminderit për vëmendjen si dhe bashkëpunimin. Redaksia e albinfo.ch.