CH-Ballkani

Mijëra shqiptarë provojnë fatin në Emiratet Arabe

Jo vetëm për shqiptarët që jetojnë në Shqipëri, por edhe ata nga Kosova, Maqedonia dhe Mali i Zi duan të shkojnë e të punojnë në vendet arabe

Emiratet e Bashkuara Arabe, gjegjësisht shtetet e Gjirit janë kthyer në një destinacion ëndrre për shumë të rinj shqiptarë, karriera e të cilëve kishte pak gjasa të lulëzonte në atdhe, shkruan ‘Balkaninsight.com’.

Artion Marra vendosi të emigrojë në Emiratet e Bashkuara Arabe, në kërkim të një jete më të mirë tre vite më parë. “Kam kaq shumë projekte dhe mundësi tani dhe ato do të më mbajnë në Emirate për një kohë të gjatë. Eksperienca ime këtu ka qenë një bekim”, ka thënë ai, përcjell albinfo.ch.

Përpara vitit 2009, pak shqiptarë punonin në vendet arabe, por sot mijëra syresh punojnë atje, duke e parë si destinacionin kryesor për të rinjtë që kërkojnë mundësi të reja profesionale dhe financiare.

“Vendet arabe janë një minierë ari për njerëzit si unë që kishin vështirësi në gjetjen e një vendi pune në Shqipëri”, shtoi ai.

Ermal Jauri, drejtor i një agjencie rekrutimi dhe Përfaqësues i Emirateve të Bashkuara Arabe në Dhomën e Tregtisë në Tiranë tha se vendet arabe filluan të kërkojnë punonjës në Shqipëri më 2009 dhe pastaj mijëra të rinj e kanë ndjekur këtë mundësi.

Ai tha se vendet e Gjirit janë bërë një zgjedhje e preferuar, jo vetëm për shqiptarët që jetojnë në Shqipëri, por edhe për ata nga Kosova, Maqedonia dhe Mali i Zi. Agjencia e tij së fundmi ka hapur degë në të gjitha këto vende.

Numri i saktë i shqiptarëve që kanë shkuar për punë në vendet arabe gjatë viteve të fundit nuk dihet, por duke folur për agjencinë e tij Jauri thotë se gjatë viti 2016 janë nënshkruar 280 kontrata pune nga Shqipëria dhe 78 nga Kosova për në Emiratet e Bashkuara Arabe.