Uncategorized

Ministri zviceran, vizitën e parë zyrtare e bën në vendin e prejardhjes

Ai është përgjigjur se është përcaktuar të vizitojë më së pari Italinë për faktin se ai vetë ka prejardhje nga Italia. Cassis, ndonëse i lindur në Zvicër, deri në moshën 15 vjeçare ka pasur vetëm pasaportën italiane

Ministri i ri i Punëve të Jashtme i Zvicrës, Ignazio Cassis, në vizitën e tij të parë jashtë vendit në këtë cilësi, ka takuar sot në Romë Ministrin e Punëve të Jashtme të Italisë, Angelino Alfano.

Në fokus të këtij takimi kanë qenë çështjet mbi taksat dhe financat si dhe problemi i pranishëm mes dy vendeve, ai i punëtorëve ndërkufitarë “Frontalieri”. Siç dihet, mijëra punëtorë italianë kalojnë çdo ditë kufirin për të punuar në zonat kufitare të Zvicrës, duke vazhduar të banojnë në Itali. Shumë zviceranë të këtij regjioni fajësojnë këta punëtorë se “po ua marrin punën”. Qeveria e Kantonit jugor, Tiçinos, ku e ka domicilin edhe Cassis ka bërë disa muaj më parë një hap në lidhje me taksimin e punëtorëve në fjalë. Prej atëherë ajo nuk këmbëngul më në kërkimin e certifikatës nga regjistri penal për punëtorët italianë.

Ministrit Cassis i është bërë pyetja përse ka thyer rregullin (e pashkruar) të ndjekur nga ministrat e deritashëm, të cilët vizitën e parë zyrtare e kanë bërë në Austri. Ai është përgjigjur se kjo ka të bëjë, veç tjerash, me faktin se ai vetë ka prejardhje nga Italia. Të kujtojmë: Cassis, ndonëse i lindur në Zvicër, deri në moshën 15 vjeçare ka pasur vetëm pasaportën italiane, të babait. Gjyshi i tij nag ana e babit kishte ardhur në Zvicër nga një lokalitet italian në afërsi të kufirit me Zvicrën.