Kosova

Mulhaxha Kollçaku bën thirrje për bashkim në VV

"Duhet të ketë bashkim rreth demokracisë e jo individit, duhet kemi bashkim për vlerat, bashkim rreth parimeve, bashkim kundër pushtetit", ka thënë ajo

Pas problemeve të brendshme në Lëvizjen Vetëvendosje! të cilat u shpërfaqën në media, kjo parti po mban mbledhjen e Këshillit të Përgjithshëm, ku nënkryetarja, Fatmire Mulhaxha Kollçaku gjatë fjalimit të saj ka bërë thirrje për bashkim e jo ndarje, përcjell albinfo.ch.

“Duhet të ketë bashkim rreth demokracisë e jo individit, duhet kemi bashkim për vlerat, bashkim rreth parimeve, bashkim kundër pushtetit”, ka thënë ajo. Mulhaxha ka folur edhe për rezultatin e zgjedhjeve nacionale e lokale, e po ashtu edhe për dënimin e aktivistëve të kësaj partie, si dhe procesin gjyqësor ndaj deputetëve Albin Kurti e Donika Kadaj.

“Në mbledhjen e sotme do të diskutojmë edhe koalicionet me partitë e tjera. Në ato që kemi fituar, por edhe ato në të cilat jemi në koalicion. Gjithashtu do të diskutojmë për zgjedhjen e kryetarit të Vetëvendosjes, pasi siç dihet mandati i Ymerit do të përfundojë në janar. Statutin tonë e kemi votuar se bashku dhe jemi mburrur se e kemi më të mirin nga të gjitha partitë dhe këtë duhet ta zbatojmë tani. Bëj thirrje që të jemi të bashkuar”, ka thënë ajo.

Në këtë mbledhje përveç kryetarit Visar Ymeri nuk po marrin pjesë as Dardan Molliqaj e Aida Dërguti.